ANAMA-nın fəaliyyəti UNICEF tərəfindən qiymətləndirilib
Partlayıcı Sursatların Təhlükəsinə dair Maarifləndirmə (PSTM) proqramı çərçivəsində Azərbaycanın Minatəmizləmə Agentliyinin (ANAMA) icra etdiyi fəaliyyət UNİCEF tərəfindən yüksək dəyərləndirilib.
Minatəmizləmə Agentliyindən “Poliqon”a verilən məlumata görə, bu haqda UNICEF-in Nyu Yorkda yerləşən baş qərargahının Uşaqların Müdafiəsi Bölməsinin və PSTM mərkəzinin rəhbəri Hugues Laurenge Agentliyə rəsmi səfəri zamanı qeyd edib.
Azərbaycan Minatəmizləmə Agentliyinin İdarə Heyətinin sədri Vüqar Süleymanov UNİCEF nümayəndə heyəti ilə görüş zamanı bildirib ki, maarifləndirmə istiqamətində layihələrin uğurlu icrası 20 ilə yaxın davam edən sıx əməkdaşlığın baris nümunəsidir.
Nümayəndə heyətinə, Agentliyin yaradılma tarixçəsi, ümumi fəaliyyəti, icra edilən humanitar minatəmizləmə əməliyyatları və işğaldan azad edilən ərazilərdə mövcud mina təhlükəsi haqda prezentasiya təqdim edilib.
İşğaldan azad edilmiş ərazilərin yaxınlığında yaşayan əhali arasında təhlükəsiz davranış qaydaları və məlumatlılığın artırılması məqsədilə ikitərəfli əməkdaşlığın davam etdirilməsi sahəsində gələcək fəaliyyətin perspektivləri üzrə fikir mübadiləsi aparılıb.