155 mm-lik “Scorpio-XR” artilleriya mərmisinin atış sınağı keçirilib

“BAE Systems” şirkətinin “Scorpio-XR” uzadılmış mənzilli artilleriya mərmisi atış sınağında hədəfi dəqiqliklə vurub.

“Poliqon” “BAE Systems”ə istinadən xəbər verir ki, bir neçə atış zamanı mərmi sınaq məqsədlərini əhəmiyyətli dərəcədə üstələyərək hədəfə yönəlib və dəqiq zərbə endirib.

“BAE Systems” və ABŞ Ordusunun Döyüş Bacarıqlarının İnkişafı Komandanlığının Silahlanma Mərkəzi (DEVCOM AC) tərəfindən birgə keçirilən bu sınaqlar, 155 mm-lik “Scorpio-XR” mərmilərinin “Joint Ballistics Memorandum of Understanding” çərçivəsində 155 mm 52 kalibrli haubitsalarla tam uyğun işlədiyini sübut edib.

Bu mühüm mərhələ “BAE Systems” şirkətinin ABŞ Ordusu ilə əməkdaşlıq edərək idarə olunan mərmi texnologiyasını inkişaf etdirmək, artilleriya mərmilərinə əsaslı yeniliklər gətirmək qabiliyyətini sərgiləyir. “Scorpio-XR” qabaqcıl sensorlarla birgə tətbiq olunduqda, mövcud artilleriya mərmilərinin mənzilini iki dəfədən çox artıraraq yüksək dəqiqliklə zərbə endirmək və 155 mm-lik artilleriya sistemlərinin döyüş qabiliyyətini mübahisəli əməliyyat mühitlərində gücləndirmək imkanı yaradır.

Əvvəllər XM1155-SC adlandırılan bu inkişaf etmiş uzun mənzilli idarə olunan mərmi indi “Scorpio-XR” adını daşıyır. Bu ad onun artırılmış mənzilini, dəqiqliyini və zərbə gücünü əks etdirir. Daha əvvəl “Scorpio-XR” müxtəlif 39 kalibrdən 58 kalibrədək 155 mm-lik artilleriya sistemlərindən atılaraq rekord məsafələrdə hədəfləri dəqiq şəkildə vurub.