ABŞ-ın “Defense News” jurnalı dünyanın ən böyük 100 müdafiə sənayesi şirkətinin yer aldığı “Defense News Top 100 for 2026” siyahısını açıqlayıb.
“Poliqon” xəbər verir ki, builki reytinqdə Türkiyənin 5 müdafiə sənayesi şirkəti yer alıb.
Türkiyə şirkətləri arasında ən yüksək nəticəni ASELSAN göstərib. Şirkət ötənilki reytinqdə 43-cü pillədə qərarlaşdığı halda, bu il 40-cı sıraya yüksəlib.
TUSAŞ 47-ci pillədən 48-ci sıraya geriləyib. ROKETSAN isə 71-ci yerdən 64-cü pilləyə yüksəlib. MKE-nin mövqeyi də bir pillə dəyişərək 80-ci yerdən 81-ci sıraya düşüb.
Türkiyə üçün builki reytinqin ən diqqətçəkən nəticələrindən biri “ARCA Savunma”nın siyahıya ilk dəfə daxil olmasıdır. Şirkət 53-cü pillədə qərarlaşıb.
“Defense News Top 100 for 2026” siyahısının ilk onluğu isə belədir:
- “Lockheed Martin” – ABŞ
- RTX – ABŞ
- “General Dynamics” – ABŞ
- “Northrop Grumman” – ABŞ
- “BAE Systems” – Böyük Britaniya
- “Boeing” – ABŞ
- “Aviation Industry Corporation of China” – Çin
- “L3Harris Technologies” – ABŞ
- “Leonardo” – İtaliya
- “Airbus” – Niderland/Fransa
Qeyd edək ki, Rusiya şirkətləri 2023-cü ildən etibarən siyahıya daxil edilmir.
