İsrail şirkəti Braziliya Ordusuna “Hermes 900” PUA-ları tədarük edəcək
İsrailin “Elbit Systems” şirkətinin Braziliyadakı törəmə şirkəti “AEL Sistemas” və Braziliya Hərbi Hava Qüvvələri arasında “Hermes 900” pilotsuz uçuş aparatlarının alqı-satqısına dair müqavilə imzalanıb.
“Poliqon” xəbər verir ki, müqaviləyə əsasən “AEL Sistemas” şirkəti Braziliya Hərbi Hava Qüvvələrinə 2 ədəd “Hermes 900” (Braziliya xidmətində RQ-900) MALE sinif PUA və onun ehtiyat hissələrini tədarük edəcək.
Müqavilə çərçivəsində “Hermes 900” PUA-ların 16 ay ərzində sifarişçiyə çatdırılması planlaşdırılır. Yeni PUA-lar 2014-cü ildə Squadron Horus üçün alınan tək “Hermes 900” PUA-ya qoşulacaq.
“Hermes-900” PUA-nın faydalı yükünə elektro-optik/infraqırmızı sensorlar, SAR radarı, radioelektron kəşfiyyat, həmçinin radioelektron mübarizə və hiperspektral sensorlar daxildir. 9100 metr yüksəkliyə qalxa və havada fasiləsiz 36 saat uça bilən PUA-nın faydalı yükü 350 kq, qanad açıqlığı 15,3 metr, uzunluğu 8.3 metr təşkil edir.