ABŞ Çexiyaya 5.6 milyard dollarlıq F-35 satışını təsdiqləyib

ABŞ hökuməti Çexiyaya 5.6 milyard dollar dəyərində 5-ci nəsil F-35 döyüş təyyarələrinin satışını təsdiqləyib.

Bu barədə “Poliqon” ABŞ-ın Müdafiə Təhlükəsizliyi Əməkdaşlıq Agentliyinə (DSCA) istinadən xəbər verib.

Bildirilib ki, sifarişə 24 ədəd F-35 qırıcısı ilə lazımi avadanlıqların və sursatların satın alınması, eləcə də onlara təmir, texniki xidmət, ehtiyyat hissə və logistika dəstəyinin göstərilməsi aiddir.

Həmçinin, sifarişə daxildir:

• 25 ədəd “Pratt and Whitney” F135-PW-100 mühərriki (24 quraşdırılmış, 1 ehtiyat);
• 70 ədəd “hava-hava” tipli AMRAAM raketi (AIM-120C-8 versiya);
• 86 ədəd GBU-53/B Small Diameter Bombs II (SDB II) aviasiya bombası;
• 12 ədəd Mk-84 aviasiya bombası və s.

Sifariş ilə bağlı baş podratçı rolunda ABŞ-ın “Lockheed Martin”, “Raytheon Missiles and Defense” və “Boeing” şirkətləri çıxış edəcək.

Qeyd olunub ki, sözügedən satış həm Çexiyanın müdafiə qabiliyyətini təkmilləşdirəcək, həm də regiondakı NATO əməliyyatlarına dəstək verəcək.