AzTU-da Vətən müharibəsi iştirakçıları ilə tələbələrin görüşü keçirilib
Azərbaycan Respublikasının Gənclər Fondunun dəstəyi, Azərbaycan Tələbə Gənclər Təşkilatları İttifaqı (ATGTİ) və “Böyük Qayıdış” Gənclər İctimai Birliyinin birgə təşkilatçılığı, Azərbaycan Texniki Universitetinin (AzTU) tərəfdaşlığı ilə “44 Günün Qəhrəmanları” layihəsi çərçivəsində Vətən müharibəsi iştirakçılarının tələbələrlə görüşü keçirilib.
Bu barədə “Poliqon”a Azərbaycan Texniki Universitetinin mətbuat xidmətindən məlumat verilib.
AzTU-da keçirilən görüşdə əvvəlcə Azərbaycanın ərazi bütövlüyü uğrunda canından keçən Vətən övladlarının xatirəsi bir dəqiqəlik sükutla yad olunub, Azərbaycanın Dövlət Himni səsləndirilib.
Tədbirdə AzTU-nun rektoru Vilayət Vəliyev, Elm və innovasiya üzrə prorektor Çetin Elmas, Gənclər Fondunun icraçı direktorunun müavini Qədir Xəlilov, universitetin Vətən müharibəsində qazi olmuş tələbəsi Elşən Mehdiyevin atası Sübut Mehdiyev çıxış edib.
Qeyd olunub ki, Prezident İlham Əliyevin rəhbərliyi altında 44 günlük Vətən müharibəsində iştirak edib xalqa qələbə müjdəsi verən qəhrəmanların gənc nəslə tanıdılması təqdirəlayiqdir. Bildirilib ki, AzTU hər zaman tələbələrin vətənpərvərlik ruhunun inkişaf etdirilməsinə böyük önəm verir. AzTU-nun tələbələri torpaqların azadlığı uğrunda gedən bütün müharibələrdə ön sıralarda xidmət edib. Vətən müharibəsində universitetin tələbə və məzunları arasında 31 nəfər şəhidlik zirvəsinə ucalıb. Onlarla məzun qazi olub. O da vurğulanıb ki, qalib ölkənin tələbələri bundan sonra da öz təhsilləri, savadları, vətənpərvərlikləri ilə ön sıralarda olmalıdır.
Tədbirdə Vətən müharibəsindəki zəfər salnaməsinin əks olunduğu videoçarx nümayiş etdirilib.
Daha sonra “Böyük Qayıdış” təşkilatının idarə heyətinin üzvü, bir çox xüsusi döyüş əməliyyatlarının və Aprel döyüşlərinin iştirakçısı, Qarabağ qazisi, Xüsusi Təyinatlı Qüvvələrin ehtiyatda olan baş leytenantı Əhliyət Mehdiyev çıxış edərək 44 günlük Vətən müharibəsində əldə olunan şanlı qələbə barədə fikirlərini bildirib.
Tədbirdə iştirak edən Vətən müharibəsi qaziləri müharibə ilə bağlı xatirələrini tələbələrlə bölüşüb. Qazilər gənc nəslin vətənpərvərlik ruhunun inkişaf etdirilməsi məqsədilə təşkil olunan görüşün keçirilməsinə görə AzTU rəhbərliyinə təşəkkür ediblər.
Çıxışlardan sonra qazilər tələbələrin Vətən müharibəsi ilə bağlı suallarını cavablandırıb.
Tədbirin sonunda universitetin tələbələri adından AzTU-nun İnformasiya və telekommunikasiya texnologiyaları fakültəsinin tələbəsi, şəhid Zülfüqar Fərəcovun oğlu Əmrah Fərəcov və AzTU Tələbə Gənclər Təşkilatının sədri Lalə Rüstəmova çıxış edərək qazilərə təşəkkür edib.
