“Bayraktar TB2” hədəfi işarələdi, “Akıncı” ASELSAN LGK-81 ilə vurdu

Türkiyədə gecə vaxtı “Bayraktar TB2” pilotsuz uçuş aparatının lazerlə işarələdiyi hədəfi “Akıncı” PUA ASELSAN şirkətinin LGK-81 lazer tuşlama dəsti ilə məhv edib.

“Poliqon” xəbər verir ki, bu barədə ASELSAN şirkətinin “Twitter” səhifəsində məlumat paylaşılıb.

Bildirilib ki, ASELSAN istənilən şəraitdə milli PUA-lara üstün zərbə gücü qazandırmağa davam edir.

ASELSAN tərəfindən LGK lazer tuşlama dəsti idarə olunmayan aviasiya bombaları üçün hazırlanıb. Bu yeni dəstlər bombaları sərfəli və son dərəcə etibarlı “ağıllı” sursata çevirən avadanlıqdır.

LGK lazer tuşlama dəsti stasionar və hərəkətli hədəflərə qarşı daha yüksək vuruş dəqiqliyi, atəş məsafəsinin artması, kənar ziyan və atışdan sonra hədəfi dəyişdirmə imkanlarını təmin edir. Dəst, yarıaktiv lazer özütuşlama başlığı, tuşlama bölməsi, istilik batareyası, qanad sükan sistemi və arxa quyruqdan ibarətdir.

Sursat hədəfdən əks olunan lazer şüası ilə idarə olunur: lazer özütuşlama başlığı hədəfdən əks olunan lazer şüasını qəbul edir, sükanlar isə bombanı lazerlə işarələnmiş hədəfə yönəldir. Fəaliyyət məsafəsi 12 km, atılma hündürlüyü 12000 metr, dairəvi sapma ehtimalı 10 metr, zərbə bucağı 15O təşkil edir.

Qeyd edək ki, hazırda LGK lazer tuşlama dəsti ilə təchiz edilən aviasiya bombaları Azərbaycan Hərbi Hava Qüvvələrinin (HHQ) silahlanmasında da yer almaqdadır.

Əlimizdə olan məlumata görə, Vətən müharibəsində əks hücum əməliyyatları zamanı Hərbi Hava Qüvvələrinə məxsus Su-25M döyüş təyyarələri tərəfindən LGK lazer tuşlama dəsti geniş istifadə edilib. “Bayraktar TB2” silahlı pilotsuz uçuş aparatlarının lazer işarələməsindən sonra Su-25M döyüş təyyarəsi LGK lazer tuşlama dəsti ilə komplektləşdirilən aviasiya bombası ilə Ermənistan Ordusunun hədəflərini uğurla sıradan çıxarıb.

Vətən müharibəsində Azərbaycan HHQ-nin Su-25M döyüş təyyarələrinin LGK lazer tuşlamalı ağıllı aviasiya bombasından istifadə etməsi minimum sursat tətbiqi ilə daha çox sayda hədəflərin dəqiq və daha təhlükəsiz şəraitdə sıradan çıxarılması ilə nəticələnib. Fakt olaraq onu deyə bilərik ki, LGK-nin ənənəvi bombaları ağıllandırmasının düşmənin təyin olunmuş 65 hədəfini, o cümlədən hərbi qüvvəsini, DOT və DZOT-larının, hərbi obyektlərinin və texnikasının 100 faiz məhv edilməsində böyük rolu olub.

Poliqon.az