BMPT-lərin növbəti partiyası Rusiya Quru Qoşunlarına təhvil verilib

“Rostex” Dövlət Korporasiyasının “Uralvaqonzavod” (UVZ) konserni BMPT “Terminator” tanka dəstək döyüş maşınlarının növbəti partiyasını Rusiya Quru Qoşunlarına təhvil verib.

“Poliqon” UVZ-yə istinadən xəbər verir ki, BMPT-lər xüsusi hərbi əməliyyat zamanı özünü yaxşı tərəfdən göstərib və hazırda Rusiya Quru Qoşunlarında çox tələb olunur.

““Uralvaqonzavod” BMPT üzrə böyük sifarişi yerinə yetirir. Bu maşına tələbat yüksəkdir. Həmişə hesab olunub ki, Quru Qoşunlarının əsas vurucu qüvvəsi tanklardır. İndi isə demək olar ki, onlara BMPT-lər də əlavə olunub. Döyüş təcrübəsi göstərib ki, bu maşınlar həm tanklarla birlikdə, həm də müstəqil istifadə oluna bilərlər”, – deyə konsernin baş direktoru Aleksandr Potapov bildirib.

Qeyd edilib ki, UVZ konstruktorları döyüş təcrübəsini nəzərə alaraq tank dəstək döyüş maşınının xarakteristikalarını daim təkmilləşdirirlər. 2025-ci il nümunəsi maşınlarda dinamik müdafiənin sayı artırılıb və yan panellərə əlavə qoruma quraşdırılıb.

Müasir rəqəmsal atəş idarəetmə sistemi bütün silahlardan həm dayanıqlı, həm də hərəkətdə atəş açmağa, gündüz və gecə əməliyyat aparmağa imkan verir. BMPT həmçinin müxtəlif məsafədə və müxtəlif kurs bucaqlarında yerləşən üç fərqli hədəfi eyni anda atəşə tuta bilir.