Türkiyənin “Canik” və onun qrup şirkətləri 6-cı Azərbaycan Beynəlxalq Müdafiə Sərgisi – ADEX-2026-da geniş məhsul çeşidini nümayiş etdirib.
“Poliqon” xəbər verir ki, “Canik”in stendində tapançalardan ağır pulemyotlara, orta çaplı toplardan uzaqdan idarə olunan silah sistemlərinə qədər müxtəlif silah və inteqrə edilmiş həllər təqdim olunub.
“Canik” məhsulları uzun illərdir Azərbaycanda təhlükəsizlik qüvvələrinin və Ordunun silahlanmasında istifadə olunur. Tapançalarla başlayan əməkdaşlıq hazırda 12,7×99 mm çaplı ağır pulemyotların quru, dəniz və hava platformalarına inteqrasiyası ilə daha geniş miqyas alıb.
Bu gün “Canik” dünyanın ən geniş 12,7×99 mm-lik ağır pulemyot məhsul ailələrindən birinə və yüksək istehsal gücünə malikdir. Şirkət M2 QCB, M2F, M3 və M3 FALCON modelləri ilə müxtəlif əməliyyat ehtiyaclarını qarşılayan ağır pulemyot həlləri təqdim edir.
“Canik”in Azərbaycandakı fəaliyyəti yalnız silah tədarükü ilə məhdudlaşmır. Qrup şirkəti UNIROBOTICS tərəfindən hazırlanmış uzaqdan idarə olunan silah sistemləri, xüsusilə müasir döyüş meydanında geniş istifadə olunan insansız dəniz aparatlarına da inteqrasiya edilir.
Silah, uzaqdan idarə olunan silah sistemi və platforma inteqrasiyasını eyni qrup daxilində həyata keçirən “Canik” mexaniki, elektron və proqram təminatı inteqrasiyasını əhatə edən kompleks, “açar təslim” həllər təqdim edir.
“Canik” və qrup şirkətləri qarşıdakı dövrdə Azərbaycanda məhsul və həll çeşidini orta çaplı sistemlərlə daha da genişləndirməyi hədəfləyir. Bu istiqamətdə qrup şirkəti “AEI Systems” tərəfindən 60 ildən artıq mühəndislik təcrübəsi əsasında hazırlanmış 30×113 mm-lik VENOM LR aşağı geri təpməli topu ön plana çıxır. VENOM LR quru və dəniz platformaları ilə yanaşı, pilotsuz sistemlərin də atəş gücü tələblərini qarşılamaq üçün nəzərdə tutulub.
