Daha beş ölkə Ukraynaya dəstək üçün yaradılan EW Koalisiyasına qoşulub
Ukraynanın Müdafiəsi üzrə Təmas Qrupunun iclasının digər mühüm nəticəsi Elektron Müharibə (EW) Koalisiyasının genişləndirilməsidir.
“Poliqon” xəbər verir ki, bunu Ukraynanın müdafiə naziri Rüstəm Umerov deyib.
Nazirin sözlərinə görə, daha beş ölkə – Belçika, İsveç, İtaliya, Türkiyə və Estoniya Niyyət Məktubuna müvafiq əlavəni imzalayaraq təşəbbüsə rəsmən qoşulub.
O, EW Koalisiyasının bu ilin aprelində Ukrayna, Almaniya və digər səkkiz tərəfdaş dövlətin təşəbbüsü ilə yaradıldığını xatırladıb.
R.Umerov vurğulayıb ki, Almaniya koalisiyanın lideri kimi artıq EW sahəsində avadanlıq və xidmətlərin satın alınması üçün maliyyə mexanizmi yaradıb. Hər şey onların tez bir zamanda beynəlxalq hərbi yardım kimi Ukrayna Silahlı Qüvvələrinə köçürülməsi üçündür.
“Elektron müharibə bizə düşməni məhv etməyə, sıxışdırmağa və bir addım qabaqda saxlamağa imkan verən müasir müharibənin əsas imkanlarından biridir. Koalisiyaya yeni tərəfdaşların da qoşulacağını gözləyirik”, – deyə Ukraynanın müdafiə naziri qeyd edib.
