![Daxili Qoşunlarda andiçmə mərasimləri keçirilib Daxili Qoşunlarda andiçmə mərasimləri keçirilib](https://poliqon.az/wp-content/uploads/2021/08/20210807_1_b-1.jpg)
Daxili Qoşunlarda andiçmə mərasimləri keçirilib
Fevralın 5-də Daxili Qoşunların Bakı şəhərində yerləşən “N” saylı hərbi hissəsində xidmətə yeni qəbul edilmiş çağırışçıların hərbi andiçmə mərasimi keçirilib.
Daxili Qoşunların mətbuat xidmətindən “Poliqon”a bildirilib ki, mərasimdə Daxili Qoşunlar komandanının müavini – Şəxsi heyət üzrə İdarənin rəisi general-mayor İnqilab Muradov iştirak edib.
Tədbir Ümummilli Lider Heydər Əliyevin və torpaqların azadlığı uğrunda canlarından keçmiş şəhidlərin əziz xatirəsinin yad edilməsi ilə başlayıb. Nümunəvi göstərici hərbi orkestrin müşayiəti ilə Dövlət Himni ifa edilib.
Əsgərlər hərbi and içərək, Azərbaycanın mənafeyini, onun suverenliyini, ərazi bütövlüyünü və müstəqilliyini şərəflə qoruyacaqlarına, bundan ötrü canlarını belə əsirgəməyəcəklərinə söz veriblər.
Tədbirdə çıxış edən hərbi hissə komandiri polkovnik Telman Həsənov əsgərlərə hərbi andın mənasını, öz xalqına, Azərbaycana və Azərbaycan hökumətinə sədaqətlə and içən hərbi qulluqçuların üzərinə düşən şərəfli və məsul vəzifələri, eləcə də Konstitusiyanın müvafiq maddələrinin tələblərini xatırladıb.
Sonra Daxili İşlər nazirinin müavini – Daxili Qoşunların komandanının hərbi andiçmə münasibətilə əsgərlərə ünvanladığı təbriki çatdırılıb.
Təbrikdə hərbi andı qəbul edən hərbi qulluqçuların qoşunların bütün şəxsi heyəti kimi, Azərbaycan Prezidenti İlham Əliyev tərəfindən qarşıya qoyulan hər bir tapşırıq üçün şəxsi məsuliyyət daşıdıqları, bundan əlavə, Daxili Qoşunların möhkəmlənməsi və qüdrətlənməsi üçün göstərilən diqqət və qayğının xidmət edən hər bir gənci öz vəzifələrini mətinliklə yerinə yetirməyə ruhlandırdığı da vurğulanıb.
Qeyd olunub ki, hərbi and içərək respublikanın müstəqilliyini, suverenliyini və ərazi bütövlüyünü göz bəbəyi kimi qorumağa söz verməklə, hər bir hərbi qulluqçu bu müqəddəs andın mənasını tam olaraq dərk etməlidir.
Təbrikdə, həmçinin, 2020-ci il sentyabrın 27-dən başlayan və 44 gün davam edən Vətən müharibəsində Daxili Qoşunların şəxsi heyətinin fədakarlıq göstərərək, şərəfli döyüş yolu keçdiyi bildirilib.
Sıralara daxil olan hər bir hərbi qulluqçunun Azərbaycanın Konstitusiyasına, hərbi anda və nizamnamələrə sadiq qalacağına, dövlətçiliyin qorunması və qüdrətlənməsi naminə uğurlar qazanacağına əminlik ifadə olunub.
Təntənəli gün münasibətilə çıxış edənlər əsgərləri səmimi qəlbdən təbrik edərək, onları cəsur və intizamlı olmaqla, hərbi bilikləri öyrənməyə, daim Vətənin müdafiəsinə hazır olmağa səsləyiblər.
Mərasim şəxsi heyətin təntənəli keçidi ilə başa çatıb.