“Drok” özüyeriyən minaatanının mühafizə və texniki hissəsi təkmilləşdiriləcək

Rusiyanın “Rostex” Dövlət Korporasiyası Şimal Hərbi Dairəsində istifadəsinin nəticələrinə əsasən “Drok” özüyeriyən minaatanının mühafizə və texniki hissəsini təkmilləşdirəcək.

“Poliqon” “Rostex” Dövlət Korporasiyasına istinadən xəbər verir ki, eksperimental partiyası ötən yay qoşunlara çatdırılan “Drok” özüyeriyən minaatanı xüsusi əməliyyat zonasında döyüş istifadəsinin nəticələrinə əsasən, müsbət rəylər alıb.

Bildirilib ki, “Drok”un tərtibatçıları və istehsalçıları texniki hissənin təkmilləşdirilməsi, eləcə də istismar rahatlığının artırılması, maşının yaşayış və təhlükəsizliyinin yaxşılaşdırılması ilə bağlı təqdim edilmiş təklifləri təhlil edib həyata keçirəcəklər.

“Drok” özüyeriyən minaatanı görmə xəttindən uzaqda yerləşən hədəflərin vurulması, canlı qüvvə və yüngül zirehli texnikaların məhv edilməsi üçün nəzərdə tutulub. Maşın mexanikləşdirilmiş sükan ötürücüləri və müasir atəşi idarəetmə sistemi ilə təchiz olunub. Kompleks kabinədən çıxmadan atəş açmağa imkan verir. Özüyeriyən minaatanın səfərdən döyüş vəziyyətinə keçməsi bir dəqiqədən az vaxt aparır. Bütün bunlar düşmən atəşindən tez xilas olmağa kömək edir və ekipajın mühafizəsini artırır.