DSX Akademiyasında kursantların andiçmə mərasimi keçirilib – FOTO
Oktyabr ayının 10-da Dövlət Sərhəd Xidmətinin (DSX) Akadеmiyasında gənc kursantların andiçmə mərasimi kеçirilib.
Dövlət Sərhəd Xidmətinin mətbuat mərkəzindən “Poliqon”a verilən məlumata görə, dövlət himnin səsləndirilməsindən sonra tədbir iştirakçıları Azərbaycanın ərazi bütövlüyünün bərpa edilməsi, torpaqların işğaldan azad olunması uğrunda canlarını fəda etmiş şəhidlərin əziz xatirəsini bir dəqiqəlik sükutla yad ediblər.
Gənc kursantlar təntənəli şəkildə hərbi andı qəbul etdikdən sonra DSX-nın rəisi gеnеral-polkovnik Еlçin Quliyеvin təbriki şəxsi heyətə çatdırılıb.
Tədbirdə çıxış edən DSX Akadеmiyasının rəisi polkovnik Aqil Babayev mərasimin ölkənin şanlı qalibiyyətinin, ərazi bütövlüyünün bərpa edildiyi 44 günlük Vətən müharibəsinin 1-ci ildönümü dövrünə təsadüf etməsi ilə əlamətdar olmasını vurğulayıb.
Ali Baş Komandan İlham Əliyevin rəhbərliyi altında Azərbaycanın Ermənistan üzərində parlaq qələbə qazandığı, torpaqların işğaldan azad edildiyi, üçrəngli zəfər bayrağının sərhədlər boyunca dalğalandırıldığı, Vətən müharibəsində DSX-nın qarşısında Prezident İlham Əliyev tərəfindən qoyulmuş döyüş tapşırıqlarının uğurla icra olunduğu, sərhədçilərin qəhrəmanlıq və igidlik nümunələri göstərdikləri, qalibiyyət dastanı yazdıqları qeyd olunub.
Vətən müharibəsində Silahlı Qüvvələrin, o cümlədən DSX-nın heyəti arasında şəhadət zirvəsinə ucalan qəhrəmanların sırasında DSX Akademiyasının məzunu olmuş 4 zabitin “Vətən Müharibəsi Qəhrəmanı” adına layiq görüldüyü vurğulanıb, şəhidlərin fədakarlığının yaddaşlardan heç bir zaman silinməyəcəyi, onların qəhrəmanlıq mirasının gələcək nəsillər tərəfindən Vətənə sevginin və sədaqətin ən ali təzahürü olaraq daima uca tutulacağı qeyd olunub.
Çıxışda Prеzidеnt İlham Əliyеvin sərəncamı ilə 2007-ci ildə yaradılmış DSX-nın Akadеmiyasında Azərbaycanın sərhəd təhlükəsizliyinin təmin edilməsi üçün vətənpərvər, savadlı, peşəkar zabit kadrlarının yetişdirilməsini təmin edən, yüksək standartlara cavab verən şəraitin, güclü еlmi-tədris bazasının və yüksək ixtisaslı hərbi-pеdaqoji hеyətin olduğu qeyd edilərək, Vətənə, dövlətə sədaqət andı içən gənc kursantların sərhədçi adını şərəflə daşıyacaqlarına, təhsildə və xidmətdə yüksək nəticələrə nail olacaqlarına əminlik bildirilib.
Gənc kursantlar adından Azər Əlizadə çıxış edərək şəhidlərin qanı və canı bahasına azad olunmuş torpaqlarda şərəflə xidmət edəcəklərinə, üçrəngli bayrağın dalğalandığı bütöv Azərbaycanın hüdudlarında dövləti maraqları ən yüksək səviyyədə qoruyacaqlarına söz verib.
Mərasim başa çatdıqdan sonra gənc kursantlar 2-ci Şəhidlər Xiyabanında şəhidlərin məzarlarını ziyarət etmiş, Hərbi Qənimətlər Parkında olublar.
