“Dubai Airshow 2025”: “EDGE Group” ümumi dəyəri 7 milyard dollardan çox olan müqavilələr imzalayıb

Birləşmiş Ərəb Əmirliklərinin (BƏƏ) “EDGE Group” (EDGE) şirkəti “Dubai Airshow 2025” sərgisini yüksək nəticələrlə başa vurub.

“Poliqon” EDGE-yə istinadən xəbər verir ki, şirkət “Dubai Airshow 2025”də 21 müqavilə imzalayıb.

Bunlardan biri İndoneziyanın “Republikorp” şirkəti ilə imzalanan mühüm əməkdaşlıq sazişidir. Sözügedən əməkdaşlıq nəticəsində İndoneziya Silahlı Qüvvələri ilə 7 milyard ABŞ dolları dəyərində müqavilə imzalanacaq ki, bu da EDGE-nin indiyədək əldə etdiyi ən böyük beynəlxalq razılaşma olacaq.

EDGE həmçinin Avropa müdafiə proqramlarını dəstəkləmək üçün İspaniyanın “Indra” şirkəti ilə tərəfdaşlıq, eləcə də İtaliyanın “Leonardo” şirkəti ilə birgə müəssisə yaradılmasına doğru növbəti mərhələni təşkil edən razılaşma imzalayıb. “L3Harris”, “Lockheed Martin”, “Korea Aerospace Industries”, “Hanwha Aerospace”, ASELSAN və “Magnaghi Aerospace Group” kimi qlobal şirkətlərlə də digər mühüm razılaşmalar bağlanıb.