“Saab” və “General Atomics Aeronautical Systems, Inc.” şirkətləri dünyanın ilk pilotsuz havadan erkən xəbərdarlıq (AEW) həllinin ilk uçuşunu uğurla həyata keçiriblər.
“Poliqon”un məlumatına görə, bu mühüm nailiyyət “Saab”ın “LoyalEye” radar sensorunun GA-ASI istehsalı MQ-9B pilotsuz uçuş aparatına (PUA) inteqrasiyası sayəsində mümkün olub.
Bildirilib ki, bu mərhələ bir neçə ay davam edəcək sınaq və qiymətləndirmə prosesinin başlanğıcı hesab olunur. Sınaqlar ilin sonuna qədər davam edəcək və pilotsuz havadan erkən xəbərdarlıq həllinin imkanlarının tam nümayişi ilə yekunlaşacaq.
“Saab” GlobalEye adlı pilotlu AEW&C həlli ilə tanınan və havadan erkən xəbərdarlıq sistemləri sahəsində qlobal lider hesab olunan şirkətdir. GA-ASI isə qabaqcıl pilotsuz uçuş aparatları və geniş əməliyyat təcrübəsinə malikdir. Bu sayədə şirkətlər birlikdə qabaqcıl hava müşahidə imkanları təqdim edəcək pilotsuz AEW həlli hazırlayıblar.
“Saab” və GA-ASI tərəfindən hazırlanan birgə AEW həlli erkən aşkarlama və xəbərdarlıq, uzaqmənzilli aşkarlama və izləmə, eyni anda çoxsaylı hədəflərin izlənməsi kimi geniş tətbiq sahələrini dəstəkləyəcək. Sistem həm görmə xəttindən kənar rabitə, həm də peyk rabitəsi (SATCOM) vasitəsilə fəaliyyət göstərəcək.
