“Elbit Systems” şirkəti İsrail Ordusunun “Merkava” tanklarını təkmilləşdirəcək

“Elbit Systems” şirkəti İsrail Müdafiə Nazirliyi ilə “Merkava” tanklarının təkmilləşdirilməsi üçün ümumi dəyəri təxminən 210 milyon ABŞ dolları olan müqavilələr imzalayıb.

“Poliqon” “Elbit Systems”ə istinadən xəbər verir ki, müqavilələr altı il müddətində həyata keçiriləcək.

Sözügedən müqavilələr çərçivəsində “Elbit Systems” tankların elektron komponentlərinin genişmiqyaslı yenilənməsini həyata keçirəcək ki, bu da onların istismar müddətini artıracaq. Əlavə olaraq, bir sıra bort sistemlərinin təkmilləşdirilməsi və modernizasiyası da nəzərdə tutulur.

Bu sistemlər arasında yüksək performanslı, yüngül çəkili, süni intellektlə təkmilləşdirilmiş elektro-optik nişangahlar var. Bu nişangahlar həm gündüz, həm də gecə panoramik müşahidə imkanı yaratmaqla yanaşı, hədəflərin inkişaf etmiş aşkarlanması, müəyyən edilməsi və izlənməsi qabiliyyətlərini təmin edir. Müqavilələr həmçinin ehtiyat hissələrinin tədarükünü, hərtərəfli texniki qulluq və dəstək xidmətlərinin göstərilməsini də əhatə edir.