Estoniya Cənubi Koreya istehsalı yeni K9 ÖAQ-ları təhvil alıb

Estoniya Müdafiə Nazirliyi Cənubi Koreyanın “Hanwha Aerospace” şirkəti tərəfindən istehsal edilən K9 özüyeriyən artilleriya qurğularının (ÖAQ) 6 ədədlik yeni partiyasını təhvil alıb.

“Poliqon” xəbər verir ki, bu barədə Estoniya Müdafiə Nazirliyi məlumat yayıb.

“Yeni gətirilmiş K9 “Thunder” özüyeriyən artilleriya qurğuları bizim döyüş hazırlığına, dayanıqlığa və əməkdaşlığa uzunmüddətli sadiqliyimizi əks etdirir”, – deyə məlumatda bildirilib.

Xatırladaq ki, 2023-cü ilin yanvar ayında Estoniyanın Müdafiə Nazirliyi və “Hanwha Aerospace” arasında əlavə 12 ədəd K9 ÖAQ-ın tədarükü üçün müqavilə imzalanıb. Müqavilə üzrə çatdırma işlərinin 2026-cı ilə qədər tamamlanması planlaşdırılıb. Əlavə 12 ədəd K9-un çatıdırlması ilə Estoniya Ordusunda xidmət göstərən bu ÖAQ-ların sayı 36-ya yüksələcək.

K9, hazırda dünya ölkələri tərəfindən ən çox seçilən özüyeriyən artilleriya qurğularından hesab olunur. Dəqiqədə 6-8 atəş açmaq imkanına malik ÖAQ-ın maksimum atış mənzili 40 kilometr, sursat tutumu 48 ədəd, döyüş ağırlığı isə 47 ton təşkil edir.