Filippin İsraildən ATMOS 2000 ÖAQ alıb
Filippin Silahlı Qüvvələri İsrail istehsalı olan ATMOS 2000 özüyeriyən artilleriya qurğularının (ÖAQ) partiyasını alıb.
“Poliqon”un məlumatına görə, yeni artilleriya qurğularının alınması Filippin Silahlı Qüvvələrinin modernləşdirilməsi proqramının ikinci mərhələsi çərçivəsində həyata keçirilib.
6×6 təkər formullu MAN şassisindəki ilk 155 mm/ 52 çap ATMOS ÖAQ 29 dekabr 2021-ci il tarixində təhvil verilib.
Xatırladaq ki, 2020-ci ilin aprelində Filippinin müdafiə naziri ölkənin müdafiə qabiliyyətini gücləndirmək üçün ATMOS 2000 özüyeriyən təkərli artilleriya sisteminin alınmasına 47 milyon ABŞ dolları xərcləyəcəyini açıqlayıb.
Müqaviləyə əsasən, İsrailin “Elbit Systems” şirkəti Filippin Artilleriya Alayına sursat və ehtiyat hissələri ilə birlikdə 12 ədəd ÖAQ-dan ibarət iki ATMOS 2000 batareyası təchiz edəcək. Lakin sursatın dəyərinin müqaviləyə daxil edilib-edilmədiyi və ya onun ayrıca ödəniləcəyi məlum deyil.
Əvvəllər bildirilib ki, plana əsasən, müqavilə 2022-ci ilin aprelindən həyata keçiriləcək. Lakin gördüyümüz kimi, artilleriya sistemlərinin ötürülməsinə daha əvvəl başlanılıb (həmçinin bax: Filippin İsraildən ATMOS-2000 haubitsaları alır).
ATMOS 2000 İsrailin “Elbit Systems” şirkətinin bir hissəsi olan “Soltam Systems” tərəfindən yaradılmış və istehsal edilmiş 155 mm-lik özüyeriyən haubitsadır. ATMOS 2000 ailənin ən son nəsil artilleriya sistemidir.
Haubitsa 6×6 və ya 8×8 təkər formullu yük avtomobilinin şassisinə quraşdırıla bilər. ÖAQ-da 39, 45 və 52 çap uzunluğunda lülələrdən istifadə olunur.
ATMOS 2000 155 mm-lik NATO atəş yığımlarının tam diapazonundan istifadə edə bilir. Maksimal atəş məsafəsi adi döyüş sursatları ilə 30 km, aktiv reaktiv (ERFB/BB) döyüş sursatları ilə 41 km-dir. Maksimal atəş tezliyi dəqiqədə 4 – 9 atış təşkil edir.
Xatırladaq ki, bundan əlavə, Filippin tender nəticəsində İsrailin “Elbit Systems” şirkətindən yüngül zirehli maşınlar alacaq. Müqavilənin ümumi dəyəri 196 milyon ABŞ dollarıdır (9,484,332,000 Filippin pesosu). Təkərli və tırtıllı versiyalarda olan döyüş maşınları 12 atəş yığımı avtomatik doldurmalı 105 mm-lik və 120 mm-lik yivli aşağı impulslu topla silahlanacaq (həmçinin bax: Filippin Ordusu İsrail tankları ilə silahlanır).
Əhəd Əzizov