Filippin SPYDER ZRK və C295W nəqliyyat təyyarəsi alıb
Filippin Hərbi Hava Qüvvələri (HHQ) İsrailin “Rafael Advanced Defense Systems” (“Rafael”) şirkəti tərəfindən tədarük edilən “Python” və “Derby” “yer-hava” sinif raketli SPYDER zenit-raket komplekslərini təhvil alıb.
“Poliqon” “Asia Pacific Defence Journal”a istinadən xəbər verir ki, Filippin HHQ həmçinin “Airbus Defence & Space” şirkətindən sifariş etdiyi ikinci C-295W orta taktiki nəqliyyat təyyarəsini qəbul edib.
“SPYDER” ZRK Filippin HHQ-nin Yerüstü Hava Hücumundan Müdafiə Sisteminin (Ground Based Air Defense System – GBADS) alınması layihəsi çərçivəsində, Airbus C-295W təyyarəsi isə Filippin HHQ-nin Orta Nəqliyyat Təyyarələrinin (Medium Transport Aircraft – MTA) alınması proqramı çərçivəsində əldə edilib.
Qeyd olunur ki, hər iki layihə 2018-ci ildən 2022-ci ilə qədər modernləşdirmə proqramının “Horizon 2” mərhələsinin bir hissəsi kimi proqramlaşdırılıb.
Filipoin HHQ Aviasiya bazasında keçirilən silahların və təyyarənin təhvil verilməsi mərasimində Filippin prezidenti kiçik Ferdinand R.Markos (Ferdinand R Marcos Jr), Filippin HHQ komandanı general-leytenant Konnor Entoni Kanlas (Connor Anthony Canlas), digər hərbi və müdafiə rəsmiləri, İsrailin Filippindəki səfiri İlan Flus (Ilan Fluss) iştirak edib.
Filippin üçün “SPYDER-MR” variantı “SPYDER Philippines Air Defense System” (SPADS) adlanır. Burada başqa bir müşahidə və atəşi idarəetmə radarından istifadə olunur. Hər batareyada 3 buraxma qurğusu var.
“MaxDefense Philippines” hərbi səhifəsinə görə isə, bu ZRK-dəki radar İsrailin IAI “Elta” şirkətinin həm raket əleyhinə artilleriya (C-RAM) kimi, həm də hava hücumundan müdafiə üçün istifadə edilə bilən EL/M-2138M Green Rock Gallium Nitride (GaN) radarının və EL/ M-2106 ATAR 3D yerüstü hava hücumundan müdafiə radarının kombinasiyasından ibarət ola bilər.
SPADS ZRK, yerüstü şaquli buraxma qurğularından uzun mənzilli və təkmil buraxılış sürətli “I-Derby-MR” raketindən istifadə edir.
Bildirilir ki, Filippin HHQ artıq iki batareya alıb və yəqin ki, 2023-cü ilə qədər başqa bir batareyanı da gözləyir.
Hazırda “SPYDER-MR” ZRK ölkənin ən təkmil hava hücumundan müdafiə sistemidir. O, 960-cı zenit və raket əleyhinə müdafiə qrupunun silahlanmasına daxil edilib.
Bu arada, ikinci Airbus C-295W nəqliyyat təyyarəsi Filippin HHQ-nin artıq dörd köhnə C-295M və bu ilin əvvəlində təhvil verilmiş bir Airbus C-295W təyyarəsini istismar edən 220-ci hava-nəqliyyat qanadına qoşulacaq. Tezliklə üçüncü C-295W təyyarəsinin də “Airbus” şirkəti tərəfindən çatdırılacağı gözlənilir. Təyyarə artıq İspaniyada yerüstü sınaqlardan keçirilir.
“Spyder” (Surface-to-Air PYton and DERby) ZRK, zərbə təyyarələrini, bombardmançıları, qanadlı raketləri, PUA-ları və yüksək dəqiqlikli aviasiya silahlarını aşkar və məhv etmək üçün təyin edilmiş, hər cür hava şəraitində fəaliyyət göstərən qısa mənzilli mobil zenit-raket kompleksidir.
Kompleks, aviasiya və dəniz bazaları, komanda məntəqələri, rabitə qovşaqları və s. kimi strateji obyektləri qorumaq üçün istifadə edilə bilər.
Standart kompleksin batareya tərkibinə daxildir: 6×6 təkər formullu yüksək keçidlikli “Tatra” təkərli şassisi üzərində quraşdırılmış buraxma qurğusu – 6 ədəd; nəqletmə-doldurma maşınları – 6 ədəd; kəşfiyyat və idarəetmə məntəqəsi – 1 ədəd; 35 km-ə qədər məsafədə 60 hədəfi aşkarlaya və izləyə bilən EL/M-2106NG radiolokasiya stansiyası – 1 ədəd; zenit idarə olunan raketlər – “Derby” (24 ədəd) və “Python 5” (24 ədəd):
– “Derbi” – hədəfi məhvetmə məsafəsi 35 km-ə qədər, hədəfi məhvetmə hündürlüyü 20 m-dən 16 km-ə qədər təşkil edir. Aktiv radiolokasiya özütuşlama başlığı və qəlpəli-fuqas döyüş hissəsi ilə təchiz edilib.
– “Python 5” – hədəfi məhvetmə məsafəsi 20 km-ə qədər, hədəfi məhvetmə hündürlüyü 20 m-dən 9 km-ə qədər təşkil edir. İnfraqırmızı özütuşlama başlığı ilə təchiz edilib.
Əhəd Əzizov