IDEX-2027 və NAVDEX-2027 sərgilərinin keçiriləcəyi tarix təsdiqlənib
IDEX Beynəlxalq Müdafiə Sərgisi və Konfransı ilə NAVDEX Dəniz Müdafiəsi Sərgisi və Konfransı 2027-ci ildə yenidən Birləşmiş Ərəb Əmirliklərinin (BƏƏ) paytaxtı Əbu-Dabi şəhərində keçiriləcək.
Təşkilat komitəsindən “Poliqon”a verilən məlumata görə, sərgilər 2027-ci il 25-29 yanvar tarixlərində ADNEC Mərkəzində baş tutacaq.
IDEX və NAVDEX sərgiləri BƏƏ prezidenti Şeyx Məhəmməd bin Zayed Əl Nəhyanın himayəsi altında “ADNEC Group” tərəfindən Müdafiə Nazirliyi və “Tawazun” Şurası ilə birgə təşkil olunacaq.
Bildiirlib ki, IDEX-2027 və NAVDEX-2027-yə maraq rekord səviyyədədir. Cari sərgi iştirakçılarının 70%-i artıq öz yerlərini yenidən sifariş edib və iştiraklarını təsdiqləyib. Bu isə bu mühüm tədbirə olan böyük gözləntiləri bir daha vurğulayır.
Həmçinin Beynəlxalq Müdafiə Konfransı (IDC) da sərgidən bir gün əvvəl təşkil olunacaq. IDC qlobal platforma rolunu oynayaraq, dünyanın müxtəlif yerlərindən əsas qərar qəbul edən şəxsləri, ekspertləri və liderləri bir araya gətirəcək. Tədbirin məqsədi qlobal problemlər və təhlükələr ətrafında müzakirələr aparmaq, ölkələr, institutlar və müdafiə şirkətləri arasında əməkdaşlığı gücləndirmək və gələcək çağırışların öhdəsindən gəlmək üçün innovativ həllər təqdim etməkdir.
Qeyd olunub ki, IDEX-2027 və NAVDEX-2027 sərgiləri üçün hədəflər daha da yüksəkdir. Sərgilər, sənaye liderlərinin, ekspertlərin və maraqlı tərəflərin bir araya gəldiyi daha geniş bir platforma təqdim edəcək. Tədbirdə müdafiə sənayesinin gələcəyini formalaşdıracaq ən son və innovativ texnologiyalar nümayiş etdiriləcək. Bu buraxılış, IDEX və NAVDEX-in müdafiə sektorunda şəbəkələşmə, bilik mübadiləsi və uzunmüddətli strateji tərəfdaşlıqların qurulması üçün əsas tədbir statusunu daha da möhkəmləndirəcək.
IDEX-2027 üçün qeydiyyat artıq açıqdır. Ətraflı məlumat üçün sərginin rəsmi veb saytına daxil ola bilərsiniz: www.idexuae.ae.