“Airbus” şirkəti ilk C295 axtarış-xilasetmə (SAR) təyyarəsini İspaniya Hava və Kosmik Qüvvələrinə təhvil verib.
“Poliqon” “Airbus”a istinadən xəbər verir ki, təyyarə İspaniyanın Sevilya şəhərində yerləşən şirkətin “San Pablo” müəssisəsində istehsal olunub.
CN-235 VIGMA təyyarələri parkının təbii əvəzedicisi olan C295 SAR, uçuş məsafəsi və taktiki imkanlar baxımından əhəmiyyətli üstünlüklər təqdim edir. Platforma həm dəniz, həm də quru əməliyyatlarında yüksək çevikliyi ilə seçilir. Təyyarə milli və beynəlxalq axtarış-xilasetmə missiyaları, dəniz təhlükəsizliyi əməliyyatları və qanunsuz fəaliyyətlərin, o cümlədən qaçaqmalçılığın qarşısının alınması üçün tam optimallaşdırılıb.
Artan qlobal tələbatı qarşılamaq məqsədilə “Airbus” Sevilyadakı yekun yığım xəttində istehsal tempini artıraraq, illik istehsal həcmini 10 təyyarədən 13 təyyarəyə çatdırmağı planlaşdırır.
Hazırda 39 ölkədən alınmış 335 sifarişlə dünya üzrə öz seqmentində bazarın 85%-nə sahib olan C295, bununla lider mövqedə qərarlaşıb.
