MKE 127 mm-lik milli dəniz topu lüləsinin sınaq atışlarını həyata keçirib

MKE tərəfindən istehsal edilən 127 mm/54 kalibr milli dəniz topu namlusu qəbul fəaliyyəti çərçivəsində TCG Fatih freqatında quraşdırılaraq sınaq atışlarından uğurla keçib.

Türkiyənin “Makine ve Kimya Endüstrisi” (MKE) şirkəti tərəfindən istehsal edilən 127 mm-lik milli dəniz topu lüləsi ilə sınaq atışları yerinə yetirilib.

MKE-dən “Poliqon”a verilən məlumata görə, “TCG Fatih” freqatına quraşdırılan 127 mm-lik sınaq atışlarından uğurla keçib.

Beləliklə, 76 mm-lik milli dəniz topunda qazandığı təcrübəni daha da irəli daşıyan MKE, 127 mm-lik milli dəniz topunun yerli imkanlarla istehsalı üçün başladığı layihədə mühüm bir mərhələni arxada qoyub.

Türkiyə Hərbi Dəniz Qüvvələrinin (HDQ) ehtiyacları əsasında xarici asılılığı azaltmaq və tamamilə aradan qaldırmaq məqsədilə ilkin mərhələdə 76 mm-lik dəniz topunu milliləşdirən MKE, 127 mm-lik lülədən sonra onun inteqrasiya ediləcəyi tam silah sistemini də istehsal edəcək.

MKE mühəndisləri 127 mm-lik milli dəniz topu silah sisteminə dair tədqiqat-inkişaf işlərini sürətlə davam etdirir. Yerli imkanlarla istehsal olunacaq bu sistem sayəsində Türkiyə, dünyada 127 mm-lik dəniz topu silah sistemini istehsal edə bilən az sayda ölkələrdən biri olacaq.

MKE-nin Kırıkkaledə yerləşən Ağır Silah Zavodunda istehsal edilən 127 mm-lik dəniz topu lüləsi istifadəyə hazır hala gələnədək bir sıra mühüm istehsal proseslərindən keçir.

Zavoda gətirilən xam polad ilk mərhələdə qabıq soyma emalına məruz qalır və səthdəki oksid qatları təmizlənir. Daha sonra lülənin oyulması mərhələsinə başlanılır. Materialın dayanıqlığını artırmaq üçün tətbiq edilən istilik emalından sonra lülə içi tədricən genişləndirilir.

Yiv və setlərin açılmasından sonra lülənin daxili səthi yüksək təzyiqlə xromla örtülür. Bu, həm səthi qoruyur, həm də lülənin xidmət müddətini uzadır.

Zavoda 5300 kq ağırlığında və 8 metr uzunluğunda gətirilən yüksək dayanıqlı xam polad bütün bu proseslərdən sonra 1628 kq ağırlığında və 6858 mm uzunluqda 127 mm-lik dəniz topu lüləsi kimi silah sisteminə inteqrasiya ediləcək formada hazırlanır.

Dəniz topu sahəsində Türkiyəyə qarşı tətbiq edilən örtülü embarqolara cavab olaraq MKE, 2020-ci ildə 76 mm-lik milli dəniz topu “MKE Denizhan-76”nın istehsalına başlayıb və cəmi 12 ay kimi rekord bir müddətdə layihəni tamamlayıb. Uğurlu sınaqlardan sonra ilk milli dəniz topu Türkiyə Hərbi Dəniz Qüvvələri Komandanlığına təhvil verilib.

Bu günədək Türkiyə HDQ-yə 5 ədəd “MKE Denizhan-76” çatdıran MKE, iyul ayında İndoneziya ilə də ilk ixrac müqaviləsini imzalayıb.

İnnovativ mühəndislik qabiliyyəti ilə layihələrini həyata keçirən MKE şirkəti, dəniz silah sistemləri sahəsində reallaşdırdığı istehsal ilə beynəlxalq bazardakı mövqeyini gücləndirməkdə davam edir.