NATO-nun Baş katibi Mark Rutte iyul ayında Ankarada keçiriləcək NATO Liderlər Sammiti ərəfəsində Türkiyənin müdafiə sənayesinin əhəmiyyətini vurğulayıb və bu sahədə ölkənin aparıcı şirkəti olan ASELSAN-ı yüksək qiymətləndirib.
“Poliqon” xəbər verir ki, təhlükəsizlik mühitinin dəyişməsi, həmçinin Alyansın qarşılaşdığı artan təhdid və çağırışlarla bağlı çıxış edən M.Rutte NATO-nun imkanlarının gücləndirilməsində güclü və innovativ müdafiə sənayesinin kritik rol oynadığını qeyd edib.
Bu çərçivədə, o, ASELSAN-ın əldə etdiyi nailiyyətləri və şirkətin Türkiyənin müdafiə sənayesində yaratdığı transformasiyaya verdiyi töhfələri xüsusi vurğulayıb.
Çıxışı zamanı M.Rutte 2026-cı ilin yazında Ankarada yerləşən ASELSAN müəssisələrinə etdiyi səfərə toxunaraq bildirib: “Bu yaz mən Türkiyənin ən böyük müdafiə elektronikası şirkəti olan ASELSAN-da istedadlı gənc mühəndislərlə görüşdüm. Onlar Türkiyənin müdafiə sənayesində inqilabi dəyişikliklərə təkan verirlər və bu dəyişikliklər Alyansımızın hər bir üzvünə fayda verəcək”.
Xatırladaq ki, Avropanın bazar dəyərinə görə beşinci ən böyük müdafiə sənayesi şirkəti olan ASELSAN, 2026-cı ilin aprel ayında NATO-nun Baş katibi Mark Rutteni Ankaradakı “Gölbaşı Texnologiya Bazası”nda qəbul edib. Səfər çərçivəsində şirkət müxtəlif əməliyyat sahələrini əhatə edən qabaqcıl müdafiə həllərindən ibarət geniş məhsul portfelini NATO-nun Baş katibinə təqdim edib.
Səfər zamanı ASELSAN-ın çoxqatlı “Polad Qübbə” hava hücumundan müdafiə arxitekturası, antidron həlləri, quru sistemləri, dəniz texnologiyaları, radioelektron mübarizə vasitələri və pilotsuz uçuş aparatları üçün faydalı yük sistemləri daxil olmaqla müxtəlif kritik sahələr üzrə imkanları nümayiş etdirilib. Proqram çərçivəsində şirkətin müasir müharibənin dəyişən tələblərinə cavab verən inteqrasiya olunmuş və sistem əsaslı yanaşması diqqətə çatdırılıb.
Səfərin bir hissəsi olaraq Mark Rutte ASELSAN-ın gənc mühəndisləri ilə də görüşüb və şirkətin innovasiya, texnoloji inkişaf və insan kapitalına verdiyi önəmi vurğulayıb.
Bundan əlavə, proqram çərçivəsində ASELSAN-ın genişmiqyaslı seriyalı istehsal imkanları da nümayiş etdirilib. NATO nümayəndə heyəti yüksək texnologiyalı istehsal sahələrini və son montaj xətlərini ziyarət edib, burada “Polad Qübbə” arxitekturasının əsas komponentləri və şirkətin əsas texnologiya istiqamətləri üzrə aparıcı sistemləri təqdim olunub.
Səfər ASELSAN-ın yüksək texnologiyalı istehsal imkanları və mühəndislik potensialı ilə dəstəklənən, interoperabellik qabiliyyətinə malik, genişləndirilə bilən və əməliyyat istifadəsinə hazır müdafiə həlləri təqdim etmək bacarığını nümayiş etdirib.
