“Otokar” Cənubi Amerikadakı mövqeyini gücləndirməyə hədəfləyir
Türkiyənin ən böyük quru platformaları ixracatçısı olan “Otokar” şirkəti 1-3 dekabr tarixlərində Kolumbiyanın paytaxtı Boqotada keçiriləcək Latın Amerikasının ən önəmli müdafiə sənayesi sərgilərindən biri olan “Expodefensa 2025”də iştirak edəcək.
“Otokar”dan “Poliqon”a verilən məlumata görə, Corferias Sərgi Mərkəzində keçiriləcək tədbirdə şirkət, TULPAR və COBRA II vasitələrinin miqyaslı maketlərini nümayiş etdirəcək, o cümlədən quru sistemləri sahəsindəki qabaqcıl imkanlarını təqdim edəcək.
Eyni zamanda, şirkət Cənubi Amerikada sənaye əməkdaşlığı, texnologiya transferi və yerli istehsal kimi imkanlara xüsusilə diqqət ayıracaq.
“Otokar” uzun müddətdir Cənubi Amerikanı strateji bazar kimi qiymətləndirir və regionun dəyişən tələblərini yaxından izləyir. Şirkət sənaye tərəfdaşlığı və lokallaşdırılmış istehsal modelləri daxil olmaqla, əməkdaşlıq imkanlarını qiymətləndirərək region istifadəçilərinin ehtiyaclarına uyğunlaşdırılmış həllər təklif etməyi hədəfləyir. “Expodefensa 2025” “Otokar”ın mövcud istifadəçiləri ilə görüşməsi və yeni əməkdaşlıqlar araşdırması üçün mühüm platforma rolunu oynayacaq.
“Bu gün 33000-dən çox “Otokar” hərbi vasitəsi 40-dan çox ölkədə 70-dən artıq son istifadəçiyə aktiv şəkildə xidmət göstərir. Cənubi Amerikada da uğurla fəaliyyət göstərən hərbi vasitələrimiz var. Regionda artıq istifadə olunan vasitələrin sayəsində istifadəçi gözləntilərini yaxından izləyirik. “Expodefensa”, mövcud münasibətlərimizi gücləndirmək və sənaye əməkdaşlığı, lokal istehsal kimi imkanları dəyərləndirmək üçün mühüm platformadır. Məqsədimiz regiondakı mövcudluğumuzu artırmaqdır”, – deyə şirkətin region üçün hədəflərini şərh edən “Otokar”ın Hərbi Klaster rəhbəri Sedef Vehbi bildirib.
TULPAR yüksək manevr qabiliyyəti, atəş gücü və sağ qalma qabiliyyəti ilə seçilir. Müasir orduların mövcud və gələcək tələblərini tam ödəmək üçün 28.000 kq-dən 45.000 kq-yə qədər müxtəlif variantlarda hazırlanmış çoxməqsədli tırtıllı platformadır.
TULPAR müştərilərə bu variantlarda təqdim olunur: yüngül/orta tank; piyada döyüş maşını; təmir-bərpa maşını; minaatan daşıyıcısı; hava hücumundan müdafiə platforması; atəş dəstəyi maşını; tibbi-təxliyə vasitəsi.
Bütün bu variantlar ümumi alt sistemlərə malikdir. Ən çətin iqlim və kobud relyef şəraitlərində sınaqdan keçirilmiş TULPAR, modul zireh sistemi ilə yüksək ballistik və mina qorunması təmin edir.
Yüksək atəş gücünə əlavə olaraq, TULPAR şəhər mühitində, tikili ərazilərdə və müxtəlif çətin relyeflərdə – hətta ağır platformaların hərəkət məhdudiyyəti olduğu yumşaq torpaqlarda belə effektiv fəaliyyət göstərə bilir. “Expodefensa 2025”də TULPAR 30 mm-lik MIZRAK qülləsi ilə nümayiş etdiriləcək.
Dünyada 20-dən çox son istifadəçinin aktiv xidmətdə olan COBRA II, yüksək səviyyədə qoruma, üstün mobillik, geniş daxili həcm və yükdaşıma qabiliyyəti ilə seçilir. COBRA II ballistik, mina və ƏPQ təhlükələrinə qarşı qoruma təmin edir. Yüksək güc-ağırlıq nisbəti sayəsində güclü performans sərgiləyir. Döyüşdə sınaqdan çıxmış vasitə dünyanın müxtəlif bölgələrində çətin relyef və iqlim şəraitlərində ordular tərəfindən istifadə olunur.
COBRA II geniş silah və missiya avadanlığı inteqrasiyası üçün uyğundur və sərhəd mühafizəsindən tutmuş daxili təhlükəsizlik və sülhməramlı əməliyyatlara qədər müxtəlif tapşırıqlarda uğurla tətbiq olunur. Modul quruluşu vasitəni müxtəlif rollar üçün uyğun edir: zirehli personal daşıyıcı; tank əleyhinə silah platforması; kəşfiyyat-müşahidə vasitəsi; KBRN kəşfiyyatı; komanda-idarəetmə vasitəsi; təmir-bərpa maşını; tibbi-təxliyə vasitəsi. Sərgidə COBRA II KESKİN qülləsi ilə nümayiş etdiriləcək.
