“Ramşteyn 4” görüşü keçiriləcək: Ukrayna Qərb çapına və texnikalarına keçir
“Ramşteyn formatı” kimi tanınan Ukraynanın müdafiəsi üzrə təmas qrupunun (Ukraine Defense Contact Group – UDCG) dördüncü iclası (4th Rammstein meeting) iyulun 20-də baş tutacaq. Bu dəfə iştirakçıların görüşü virtual (onlayn) formatda keçiriləcək.
“Poliqon” xəbər verir ki, bu barədə ABŞ Müdafiə Nazirliyinin (Pentaqonun) mətbuat xidməti ABŞ və Ukraynanın müdafiə nazirləri Lloyd Ostin (Lloyd James Austin III) və Oleksiy Reznikov (Олексій Юрійович Резніков) arasındakı telefon danışığı barədə hesabatında məlumat verib.
Qeyd edildiyi kimi, nazir L.Ostin həmkarı O.Reznikova ABŞ-ın Ukraynaya təhlükəsizlik yardımı, xüsusən iyulun 8-də elan edilmiş 400 milyon ABŞ dollarlıq yeni paket haqqında yenilənmiş məlumatları təqdim edib. O. Reznikov isə Pentaqon rəhbərinə Ukraynadakı vəziyyətlə bağlı məlumat verib.
Nazirlər iyulun 20-də Ukraynanın müdafiəsi üzrə təmas qrupunun növbəti iclasının gündəliyini müzakirə ediblər, həmçinin ABŞ və müttəfiqlərinin UDCG formatında Ukraynaya yardımının gələcəyi ilə bağlı fikir mübadiləsi aparıblar.
Xatırladaq ki, cari ilin aprel ayının 26-da 40-dan artıq müdafiə naziri Ukraynaya hərbi yardımı müzakirə etmək üçün Ramşteyn aviabazasına toplaşıb. İştirakçıların əksəriyyəti NATO və Aİ-nin üzvləri, həmçinin Afrika və Asiya ölkələri olub. O.Reznikov birinci görüşdən sonra bildirib ki, Ukrayna Qərb çapına və texnikalarına keçir.
Təmas qrupunun mayın 23-də keçirilən ikinci iclasında isə 47 ölkənin nümayəndəsi iştirak edib. Bu görüşdə əvvəlki iştirakçıların sıralarına Avstriya, Bosniya və Hersoqovina, Kolumbiya, Kosovo və İrlandiya da qatılıb. Görüşdə elan edilən yeni silah tədarükünə Danimarkadan olan gəmi əleyhinə HARPOON raket qurğuları, Yunanıstan, İtaliya, Norveç və Polşadan əlavə artilleriya sistemləri, eləcə də Çexiya helikopterləri, tankları və raket sistemləri daxil idi.
İyunun 15-də Brüsseldə “NATO nazirləri müşavirəsi çərçivəsində” keçirilən üçüncü Ramşteyn görüşündən sonra Ukrayna 18 ədəd 155 mm-lik M777 haubitsaları, onlar üçün 46000 dəst döyüş sursatı və yedək maşını, HIMARS yaylım atəşli reaktiv sistemlər üçün əlavə idarə olunan reaktiv mərmilər, HARPOON raketləri ilə iki sahil mühafizə sistemi, eləcə də minlərlə qorunan radiostansiya, gecəgörmə cihazları, termal və optik nişangahlar, həmçinin bir çox digər vasitələr alıb.
Əhəd Əzizov