Türkiyənin aparıcı quru sistemləri ixracatçısı olan “Otokar” şirkəti BSDA 2026 sərgisində Rumıniyada istehsal edilən ilk COBRA II zirehli maşınını nümayiş etdirir.
“Poliqon” “Otokar”a istinadən xəbər verir ki, COBRA II Avropa İttifaqı sərhədləri daxilində istehsal olunan ilk türk zirehli maşını olmaq xüsusiyyəti daşıyır.
Şirkət sərgidə yüksək atəş gücü və hərəkət qabiliyyəti ilə dünyada tanınan TULPAR zirehli texnikasını da ziyarətçilərə təqdim edir. Həmçinin “Otokar” stendində Rumıniyanın “BlueSpace Technologies” və Türkiyənin “ElektroLand” şirkətlərinin əməkdaşlığı çərçivəsində Rumıniya üçün hazırlanan yeni nəsil yerüstü robot da yer alır.
“Otokar”ın baş direktoru Aykut Özüner fikirlərini bölüşərək, şirkətin sərgidə iştirakı və yerli istehsal prosesi ilə bağlı danışıb: “Müdafiə sənayesində texnologiya transferi və yerli istehsal vasitəsilə ölkəmiz adına ilklərə imza atmağa davam edirik. COBRA II-nin Avropa İttifaqı sərhədləri daxilində istehsal olunan ilk türk zirehli maşını olmasından qürur duyuruq. Biz yalnız dost və müttəfiq ölkə Rumıniyaya NATO standartlarına uyğun zirehli texnika istehsalı qabiliyyəti qazandırmırıq, eyni zamanda Rumıniyanı Avropadakı müdafiə təchizatı proseslərimizi idarə edəcəyimiz strateji mərkəz kimi qiymətləndiririk”.
Xatırladaq ki, “Otokar” 2024-cü ildə Rumıniya Milli Müdafiə Nazirliyinin elan etdiyi ümumilikdə 1059 ədəd zirehli maşının tədarükünə dair tenderin qalibi olub. Təxminən 857 milyon avro (ƏDV xaric) dəyərindəki müqavilə çərçivəsində 270 ədəddən çox COBRA II Türkiyədə istehsal edilərək Rumıniya Ordusuna təhvil verilib. COBRA II maşınları son aylarda Rumıniyada xidmətə başlayıb. Rumıniyada yerli olaraq istehsal ediləcək maşınların ilki isə yaxın günlərdə istehsal xəttindən çıxıb və BSDA sərgisində nümayiş olunur.
“Otokar”ın Hərbi Maşınlar üzrə baş direktor müavini Sedef Vehbi, şirkətin Rumıniya və regionda tırtıllı platformalar üzrə də etibarlı tərəfdaş olmağı hədəflədiyini bildirib: “Rumıniyanın və regionun bütün quru sistemləri ehtiyaclarını qarşılamağa hazırıq. Rumıniya Silahlı Qüvvələrinin və regionun zirehli döyüş maşını ehtiyacları üçün TULPAR zirehli maşınının ən ideal həll olacağına inanırıq”.
S.Vehbi regiondakı insansız quru platforması ehtiyacına konsorsium çərçivəsində həll təqdim etdiklərini vurğulayaraq, sərgidə nümayiş olunan yerüstü robot haqqında məlumat verib.
““Otokar”, Rumıniyanın aparıcı müdafiə sənayesi şirkətlərindən olan “BlueSpace Technologies” və Türkiyənin avtonom texnologiyalar sahəsində qabaqcıl şirkətlərindən biri olan “ElektroLand” ilə birlikdə konsorsium yaradıb. Rumıniya Silahlı Qüvvələrinin çoxməqsədli insansız quru platforması ehtiyacı çərçivəsində üç şirkət öz bacarıq və imkanlarını bir araya gətirib. Bu layihə ilə Rumıniyanın müdafiə sənayesi ekosistemini gücləndirməyi və insansız sistemlər sahəsində davamlı olan yerli qabiliyyət formalaşdırmağı hədəfləyirik”, – deyə baş direktorun müavini qeyd edib.
“Otokar”ın dünya üzrə 13 ölkədə 20-dən çox istifadəçi tərəfindən seçilən COBRA II zirehli maşını yüksək hərəkət qabiliyyəti və üstün müdafiə xüsusiyyətləri ilə diqqət çəkir. Rumıniya Ordusunun spesifik texniki və taktiki tələblərinə uyğun şəkildə xüsusi konfiqurasiya edilən zirehli maşın, personal daşıyıcıdan komanda-idarəetmə versiyasına qədər bir çox variantda təqdim olunur. Effektiv hərəkət qabiliyyəti ilə yanaşı, yüksək ballistik və mina mühafizəsinə də malik COBRA II, istənilən ərazi şəraitində şəxsi heyətin təhlükəsizliyini ən yüksək səviyyədə təmin edir.
TULPAR 28 tondan 45 tona qədər genişlənə bilən modul quruluşu sayəsində müxtəlif tapşırıq profillərinə asanlıqla uyğunlaşdırıla bilir. Platforma fərqli konfiqurasiyalarda ortaq gövdə və alt sistemlərdən istifadə imkanını təmin edir. Çətin iqlim və ərazi şəraitində geniş sınaqlardan keçən texnika yüksək ballistik və mina mühafizəsi təqdim edir. “Otokar”ın BSDA sərgisində nümayiş etdirdiyi TULPAR modul zirehli tırtıllı texnikası Rumıniya və regionun ehtiyaclarına cavab verə biləcək xüsusiyyətlərə malikdir.
BSDA 2026 sərgisində “Otokar” stendinin digər mühüm platforması isə Rumıniya Silahlı Qüvvələrinin ehtiyacları üçün hazırlanan çoxməqsədli insansız quru vasitəsidir. Platforma “Otokar”, “BlueSpace Technologies” və “Elektroland” şirkətlərinin birgə yaratdığı konsorsium çərçivəsində hazırlanıb. NATO sistemləri ilə uyğun modul 6×6 platformaya malik bu yerüstü robot geniş tapşırıq spektrinə uyğun fəaliyyət göstərəcək şəkildə inkişaf etdirilib.
