“Saab”, “Boeing” və “BAE Systems” Böyük Britaniyanın yeni təlim təyyarəsi proqramı üçün əməkdaşlığa başlayır

“Saab” (İsveç), “Boeing” (ABŞ) və “BAE Systems” (Böyük Britaniya) şirkətləri Britaniya Kral Hərbi Hava Qüvvələrinin yeni təlim təyyarəsi proqramında əməkdaşlıq etmək məqsədilə Anlaşma Memorandumu imzalayıblar.

“Poliqon” “Saab”a istinadən xəbər verir ki, bu əməkdaşlıq T-7 təlim təyyarəsini proqramın əsas elementi kimi istifadə etməyə və gələcək beynəlxalq pilot hazırlığı imkanlarında üç şirkətin birgə fəaliyyətinə yol açacaq.

“Saab”, “Boeing” və “BAE Systems” Britaniya HHQ-nin pilotlarını gələcək beynəlxalq pilot hazırlığı imkanlarına ən yaxşı şəkildə hazırlamaq üçün innovativ təlim həlləri təqdim edəcəklər.

Böyük Britaniyanın “Advanced Jet Trainer” (Qabaqcıl Reaktiv Təlim Təyyarəsi) tələbi 2025-ci il Strateji Müdafiə İcmalında müəyyən olunub. Bu fəaliyyəti “BAE Systems” şirkəti idarə edəcək və sözügedən prosesə Birləşmiş Krallıqda son montaj mərhələsi də daxil olacaq. Şirkətlər canlı və virtual təlim imkanlarını və əlaqəli missiya sistemlərini birləşdirən təlim sisteminin hazırlanmasında əməkdaşlıq edəcək, həmçinin təyyarənin istehsalında Britaniya təchizat zəncirinin genişləndirilməsi imkanlarını araşdıracaqlar.

ABŞ Hərbi Hava Qüvvələri tərəfindən 2018-ci ildə seçilmiş T-7A “Red Hawk” təlim təyyarəsi bu əməkdaşlığın əsasını təşkil edir. T-7A inteqrasiya edilmiş canlı, virtual və konstruktiv (LVC) imkanlara malik qabaqcıl təlim təyyarəsidir. O, 4-cü, 5-ci və 6-cı nəsil təyyarələr üçün çoxnəsilli bir təlim sıçrayışı təmin edir. Onun çoxşaxəli dizaynı dəyişən texnologiyalara və missiya tələblərinə uyğunlaşmağa imkan verir, yeni pilotları dünyanın ən qabaqcıl çoxməqsədli qırıcı və bombardmançı təyyarələrini idarə etmək üçün hazırlayır.