Su-30SM2 qırıcılarının yeni partiyası Rusiya Müdafiə Nazirliyinə təhvil verilib

“Birləşmiş Aviasiya Korporasiyası” (UAC) Su-30SM2 qırıcılarının yeni partiyasını Rusiya Müdafiə Nazirliyinə təhvil verib.

“Poliqon” UAC-yə istinadən xəbər verir ki, Su-30SM2 qırıcıları dövlət müdafiə sifarişi çərçivəsində “İrkutsk” aviasiya zavodu tərəfindən istehsal edilir.

Bildirilib ki, döyüş təyyarələri bütün zəruri yerüstü və uçuş sınaqlarından keçdikdən sonra xidmət yerlərinə göndəriliblər.

“Biz əldə olunan nəticələrlə kifayətlənmirik və texnikanın davamlı tədarükü ilə yanaşı, xüsusi hərbi əməliyyat zamanı əldə edilən təcrübəni də nəzərə alaraq təyyarələrimizin daha da təkmilləşdirilməsi üzərində işləri davam etdiririk, eyni zamanda istehsal tempini artırırıq”, – deyə UAC-nin baş direktoru Vadim Badexa vurğulayıb.

Su-30SM2 qırıcıları Rusiya Hava-Kosmik Qüvvələri və Hərbi Dəniz Qüvvələrinin aviasiya parkında istismar olunan əvvəlki versiyaların inkişaf etdirilmiş variantıdır. Rusiya Müdafiə Nazirliyinin texniki şərtlərinə uyğun olaraq aparılan təkmilləşdirmə işləri sayəsində təyyarənin döyüş qabiliyyəti artırılıb. Xüsusilə, hava hədəflərinin aşkarlanması və tanınması diapazonu yüksəldilib. Bir neçə yüz kilometr məsafədə hava, yer və dəniz hədəflərini məhv etmək üçün döyüş təyyarələrinin silahlanmasına yeni yüksək dəqiqlikli silah sistemləri daxil edilib.