Şuşada Ermənistan ordusunun atıb qaçdığı silah-sursat tapılıb
Vətən müharibəsində işğaldan azad olunan torpaqlarda Ermənistan ordusunun atıb qaçdığı silah-sursatın aşkar edilməsi istiqamətində tədbirlər davam edir.
Daxili İşlər Nazirliyinin mətbuat xidmətindən “Poliqon”a verilən məlumata görə, Şuşa Rayon Polis Şöbəsinin əməkdaşları aidiyyatı qurumların təmsilçiləri ilə birlikdə partladıcı vasitələrin, silah-sursatın aşkar edilməsi və istifadəyə yararsız olanların zərərsizləşdirilməsi məqsədi ilə xidməti ərazidə müntəzəm reydlər aparırlar.
Belə ki, tədbirlər zamanı RPŞ əməkdaşları tərəfindən erməni hərbçilərin atıb qaçdığı 1 ədəd tüfəng, 6 müxtəlif növ qumbara, 13 qumbaraatan və minaatan mərmiləri, 5500 ədəd 7,62 çaplı patron, pulemyot və avtomat silahlar üçün güllə ilə dolu 13 sandıq və digər döyüş sursatları aşkar edilərək götürülüb.