Tacikistanın mobil operatoru “Azerspace-2” peykindən istifadə edəcək

Azərbaycan Kosmik Agentliyi (“Azərkosmos”) Tacikistanın “ZET Mobile” mobil operatoru ilə əməkdaşlıq müqaviləsi imzalayıb.

“Azərkosmos”un Mətbuat Xidmətindən “Poliqon”a verilən məlumata görə, “ZET Mobile” “Azerspace-2” peykindən istifadə etməklə Tacikistanın uzaq regionlarında yüksək keyfiyyətli rabitə xidmətlərinin təmin olunmasını təşkil edəcək.

Tacikistanda rabitə xidmətlərinə çıxış əksərən iri şəhərlərlə məhdudlaşır. “Azərkosmos”la əməkdaşlıq Tacikistanın həm rəqəmsal infrastrukturuna, həm də ucqar bölgələrdə sosial-iqtisadi inkişafa töhfə verəcək.

“ZET Mobile” mobil operatoru “Azerspace-2” peykinin xidmətlərindən istifadə etməklə müştərilərinə nəqliyyat vasitələrində, dövlət və özəl qurumlarda, eləcə də ucqar ərazilərdə rabitə və internet xidmətlərindən faydalanmaq imkanı yaradacaq.