Türkiyədə HHM və raket sistemləri ilə bağlı 6 milyard dollarlıq müqavilə imzalanıb
Türkiyənin Müdafiə Sənayesi Komitəsi və yerli şirkətlər arasında hava hücumundan müdafiə və raket sistemləri ilə bağlı 6.5 milyard ABŞ dolları dəyərində müqavilələr imzalanıb.
“Poliqon” xəbər verir ki, bu barədə Türkiyə Müdafiə Sənayesi Komitəsinin sədri Haluk Görgün özünün “NSosyal” hesabında məlumat paylaşıb.
O bildirib ki, “Polad Qübbə”ni (ÇELİKKUBBE) gücləndirən, laylı hava hücumundan müdafiəni dərinləşdirən bu addım, qəhrəman türk əsgərinin çəkindiriciliyini artıracaq və ölkənin təhlükəsizliyinə strateji töhfə verəcək. Ümumi dəyəri təxminən 6.5 milyard dollar olan bu müqavilələr Türkiyə Silahlı Qüvvələrinin əməliyyat qabiliyyətini artıracaq, hava təhlükəsizliyini möhkəmləndirəcək, yerli və milli texnologiyaların qlobal bazardakı rəqabət gücünü yüksəldəcək.
“Bu strateji layihələrdə əməyi olan Milli Müdafiə Nazirliyimizə, Türkiyə Silahlı Qüvvələrimizə, iş yoldaşlarıma, mühəndislərimizə, texniklərimizə, ASELSAN və “Roketsan” ailələrinə və töhfə verən bütün tərəfdaşlara ürəkdən təşəkkür edirəm”, – deyə H.Görgün tərəfindən qeyd olunub.
