Türkiyədə və Azərbaycanda keçiriləcək TEKNOFEST-2022 festivalına hazırlıqlar davam edir
Türkiyədə və Azərbaycanda bu il keçiriləcək TEKNOFEST Aviasiya, Kosmos və Texnologiya Festivalına hazırlıqlar davam edir.
“Poliqon” xəbər verir ki, bununla bağlı T3 Vəqfinin Mütəvəlli Heyəti başqanı və TEKNOFEST İdarə Heyətinin başqanı Səlçuq Bayraktar özünün rəsmi sosial media hesabında paylaşım edib.
TEKNOFEST-2022 festivalı Türkiyənin Samsun şəhərində və ilk dəfə Azərbaycanda Bakı şəhərində keçiriləcək.
Türkiyədə 2018-ci ildən etibarən təşkil olunan TEKNOFEST Aviasiya, Kosmos və Texnologiya Festivalı hərbi aviasiya, kosmik sənaye, rəqəmsal iqtisadiyyat, innovasiya, startap və texnologiya sahəsində dünyanın ən qabaqcıl tədbirlərindən hesab olunur. Festivalın keçirilməsinin əsas məqsədlərindən biri gənclərin qeyd olunan sahələrə diqqətini cəlb etmək və müvafiq istiqamətlər üzrə inkişafı təmin etməkdir.
Qeyd edək ki, son olaraq ötən ilin 21-26 sentyabr tarixlərində Türkiyənin İstanbul şəhərində Atatürk Hava Limanında keçirilən TEKNOFEST-2021 sayca dördüncü festival olub. Festivalda Azərbaycan Hərbi Hava Qüvvələrinin 2 ədəd MİQ-29 döyüş təyyarələri müxtəlif günlərdə nümunəvi uçuşlar ediblər.