Ukrayna hökuməti xarici zirehli maşınların təmiri bazaları və patron zavodu tikmək planlarını açıqlayıb
Ukrayna zirehli texnikaların, o cümlədən Qərb ölkələrinin tədarük etdiyi texnikaların texniki xidməti və təmiri üçün bir neçə müəssisə tikmək niyyətindədir.
“Poliqon” xəbər verir ki, bu barədə Ukraynanın müdafiə naziri Oleksiy Reznikov “Buduemo razom” (“Birlikdə qururuq”) “Forbes” onlayn konfransı zamanı bildirib.
Müdafiə naziri qeyd edib ki, Ukrayna Qərb texnikalarının komponentlərinin təmiri üçün bazaların və patron zavodunun yaradılmasında maraqlıdır.
Nazirin sözlərinə görə, hazırda Ukrayna çoxlu sayda Qərb nümunəli silahlar, o cümlədən zirehli texnika alır. Bütün bu yeni silahlar texniki xidmət və təmir tələb edir. Buna görə də belə texniki xidməti və təmiri həyata keçirə bilən bir neçə müəssisənin tikintisinə qərar verilib. Hazırda Ukrayna hökuməti həm Şərqi Avropada, həm də Qərbi Ukrayna ərazisində texnikalara texniki xidmət göstərmək üçün birgə müəssisələrin yaradılması imkanlarını nəzərdən keçirir.
“Bu gün bura, sınaqların keçiriləcəyi nəhəng təlim meydançasıdır. Bu isə o deməkdir ki, burada texnoloji məsələlər, innovativ həllər və təkliflər tələb olunacaq. Ona görə də birgə müəssisələrin formalaşdırılması, ilk növbədə Şərqi Avropa ölkələrində yerləşdirilməsi, Ukraynada isə Qərbi Ukrayna ərazisində qorunan yerlərdə yerləşdirilməsi artıq bu günün real tələbdir”, – deyə Ukraynanın Müdafiə naziri Oleksiy Reznikov bildirib.
O vurğulayıb ki, Ukraynanın müdafiə qabiliyyətinin artırılması ilə bağlı hər şeyin “tükənməz siyahısı” var. Bu, təhlükəsizlik və müdafiə sektorunu, eləcə də biznes investisiyalarını təşviq etməlidir. Ehtiyat hissələrin, texnikalar üçün müxtəlif komponentlərin və hətta patron zavodunun bərpası üçün bazaların yaradılması aktualdır.
Qeyd edək ki, Ukraynada patron zavodunun inşası məsələsi 2014-cü ildən bəri müzakirə edilir, hətta onun tikintisi üçün vəsait ayrılsa da, heç nə tikilməyib. Keçən il Kiyevdə bir anda üç layihə elan edilib: özəl patron zavodu, dövlətə məxsus patron zavodu və Kanada ilə birgə yaradılan patron zavodu. Baxmayaraq ki, onlara çox böyük maliyyə vəsaiti ayrılmışdı, bütün layihələr yalnız kağız üzərində qalıb.
Brifinq zamanı qeyd olunanlarla yanaşı, Oleksiy Reznikov bildirib ki, hazırda Ukrayna Müdafiə Qüvvələrinin səfərbərliyi ilə əlaqədar hərbçi şəxsi heyətin sayı Ukrayna Silahlı Qüvvələrində 700 minə nəfərə, Milli Qvardiyada 90 min nəfərə, Milli Polisdə 100 min nəfərə və Sərhəd Qoşunlarında 60 min nəfərə çatıb. Beləliklə, hazırda 1 milyondan çox insan müdafiə və təhlükəsizlik sektorunun fəaliyyətini təmin edir.
Xatırladaq ki, könüllülər Ukrayna Silahlı Qüvvələrinin istifadə etdiyi ABŞ istehsalı HMMWW yolsuzluq maşınlarının təmiri üçün altı müasir mobil təmir emalatxanası alıblar. Bundan başqa, o da məlumdur ki, Slovakiya, Çexiya və Bolqarıstan artıq Ukraynaya texnikaların təmiri və təkmilləşdirilməsində kömək edir.
Əhəd Əzizov