Ukraynada yeni zirehli maşınların kodifikasiya sınaqlarına başlanılıb

Ukraynanın “UkrArmoTech” şirkəti tərəfindən inkişaf etdirilən yeni GYURZA-03 və DESNA zirehli maşınlarının kodifikasiya sınaqlarına başlanılıb.

“Poliqon” “UkrArmoTech”ə istinadən xəbər verir ki, GYURZA-03, hərbçilərin sursatların təhlükəsiz daşınması ilə bağlı tələbinə cavab olaraq hazırlanıb.

Bildirilib ki, hazırda GYURZA-01 və GYURZA-02 də daxil olmaqla bütün taktiki maşınlar şəxsi heyəti, avadanlıqları və sursatları eyni desant bölməsində daşıyır. Bu isə təhlükəli hesab olunur. Bunun üçün şirkət GYURZA-03-də 5 nəfərlik tam qapalı kabin yaradaraq, sursatların daşınması ilə bağlı nəzərdə tutulan yük bölməsini desantdan ayırıb.

Əlavə olaraq, tətbiq edilən modul sxemi GYURZA-03 platformasında 3 tona qədər müxtəlif tipli avadanlıqların quraşdırılmasına (HHM kompleksləri, RLS-lər, artilleriya sistemləri) imkan verir. Buna baxmayaraq, yeni maşının əsas vəzifəsi şəxsi heyətin, yüklərin, sursatların və yüngül artilleriyanın təhlükəsiz daşınmasıdır.

DESNA zirehli nəqliyyat vasitəsi isə Ukrayna Silahlı Qüvvələrinin yüksək keçid qabiliyyətinə malik, 8 tona qədər çəkisi olan çoxməqsədli avtomobil ehtiyacına verilən cavabdır.

Şirkətin qeyd etdiyinə görə, Ukraynada yolsuzluq avtomobili hazırlamaq üçün bir neçə cəhd olub, lakin layihələr məntiqi sonluğa və kütləvi istehsala çatmayıb. Bu səbəbdən “UkrArmoTech” öz qiymətləndirmələrinə uyğun olaraq lazımi səviyyədə mühafizə, erqonomika və funksionallığa malik yeni bir nümunə hazırlayıb.

DESNA, 8 tona qədər kütləyə malik yeni çoxməqsədli zirehli avtomobildir. O, etibarlı və asan təmir edilə bilən avtomatik transmissiya və mühərrik ilə təchiz olunub. DESNA da, GYURZA-03 kimi modul konstruksiyaya malikdir. Hər iki maşında oxlar üzrə optimal çəki paylanması təmin edilib ki, bu da çətin relyefdə belə etibarlı hərəkətə imkan verir.