YENER müasir mina aşkarlama sistemi EFES-2024 təlimində istifadə olunub
ASELSAN şirkətinin hazırladığı YENER müasir mina aşkarlama sistemi EFES-2024 təlimi çərçivəsində Türkiyə Silahlı Qüvvələri tərəfindən istifadə edilib.
“Poliqon” “SavunmaSanayiST” saytına istinadən xəbər verir ki, bu yaxınlarda Türkiyə Silahlı Qüvvələrinə təhvil verilən YENER sistemi ilk dəfə olaraq EFES-2024 təlimində geniş ictimaiyyətə təqdim edilib.
Təlim ssenarisi çərçivəsində YENER sistemi öz missiyasını uğurla yerinə yetirərək minaları aşkarlayıb. Daha sonra aşkarlanan minalar ASELSAN-ın ÇAKI robot qol sistemi ilə zərərsizləşdirilib.
Qeyd edək ki, ASELSAN tərəfindən hazırlanan YENER müasir mina aşkarlama sistemi “Otokar” şirkətinin ARMA 8×8 zirehli nəqliyyat vasitəsinə quraşdırılıb. Ötən ilin sonunda Türkiyə Quru Qoşunları Komandanlığının istifadəsinə verilən zirehli texnika təchiz olunduğu xüsusi avadanlıqlar vasitəsilə əldəqayırma partlayıcı maddələrin və minaların aşkarlanması, müəyyənləşdirilməsi və işarələnməsi tapşırıqlarını yerinə yetirərək şəxsi heyətin təhlükəsizliyini yüksək səviyyədə saxlayır.
YENER sisteminin inteqrasiya olunduğu ARMA 8×8 zirehli maşın ön və yan hissəsindəki mexanizmlər tərəfindən istiqamətləndirilən radar və metal detektorları ilə marşrutda mina və partlayıcı maddələrə qarşı tədbir görülməsini təmin edir. O, yeni nəsil radar alqoritmləri sayəsində fərqli torpaq tiplərində belə müxtəlif tip və ölçülərdəki təhlükələri aşkar edə bilir.
Bu layihə üçün “Otokar” ARMA 8×8-in üstün xüsusiyyətlərini qoruyub saxlamaqla, əlavə tələblərə heç bir problem olmadan cavab verən avtomobil istehsal edib.
Onu da qeyd edək ki, ARMA zirehli maşın ailəsi 2006-cı ildən istehsal edilir və 2015-ci ildə ixrac uğuru əldə edib. Zaman keçdikcə ARMA zirehli maşın ailəsinin istifadəsi geniş yayılıb. Birləşmiş Ərəb Əmirliklərinə 400 ədəd ARMA 8×8 zirehli nəqliyyat vasitəsinin satışı bu sahədə ən mühüm ixrac uğurlarından biri olub. Yüksək səviyyədə ballistik və mina mühafizəsi təmin edən zirehli monokok gövdə və müxtəlif növ missiya avadanlığı, yaxud silah sistemlərinin inteqrasiyasına imkan verən modul quruluşu ilə seçilən ARMA 8×8 müasir döyüş meydanında və sülhməramlı əməliyyatlarda orduların ehtiyaclarını ən yaxşı şəkildə qarşılayır.