MSN və AzTU arasında müdafiə sənayesi üzrə kadr hazırlığı məsələləri müzakirə olunub

Oktyabrın 17-də müdafiə sənayesi nazirinin müavini Hidayət Əzimov Azərbaycan Texniki Universitetinin (AzTU) rektoru Vilayət Vəliyevlə görüşüb.

Müdafiə Sənayesi Nazirliyinin Mətbuat Xidmətindən “Poliqon”a verilən məlumata görə, nazir müavini H.Əzimov Azərbaycanın müdafiə sənayesinin prioritetləri, bu sahədə çağdaş tələblərə uyğun ixtisaslı kadr hazırlığı, mütəxəssislərin təkmilləşdirilməsi, ümumən innovativ mühəndisliyin inkişaf etdirilməsi ilə bağlı qarşıda duran vəzifələr barədə danışıb.

O, dünyada müdafiə sənayesinin sürətli inkişaf tempinə uyğun olaraq ölkəmizdə bu sahədə xüsusi bilikli və bacarıqlı kadrların yetişdirilməsinin perspektivləri, Elm və Təhsil Nazirliyinin elmi institutları və ali təhsil müəssisələri ilə əməkdaşlığın genişləndirilməsinin vacibliyini vurğulayıb.

AzTU-nun rektoru V.Vəliyev Azərbaycanın müdafiə sənayesi üçün ixtisaslı kadrların hazırlanması məqsədilə MSN-in təşəbbüsü əsasında 2012-ci ildən universitetdə fəaliyyət göstərən Xüsusi texnika və texnologiya fakültəsinin təhsil-tədris prosesinin təkmilləşdirilməsi ilə bağlı görülən işlər barədə məlumat verib. O, istehsalla təhsilin əlaqələndirilməsi üçün MSN-in tabeli müəssisələri ilə səmərəli əməkdaşlıq edildiyini bildirib, tələbələrin nəzəri biliklərinin praktika əsasında möhkəmləndirilməsi, onların spesifik sahədə püxtələşməsi və yeni ideyalarla çıxış etmələrinə münbit şərait yaradıldığına görə Nazirliyin rəhbərliyinə minnətdarlığını çatdırıb.

Görüşdə AzTU-da müdafiə sənayesi üçün zəruri olan ixtisasların tədris keyfiyyətinin artırılması, MSN-in mütəxəssislərinin və tələbə-müəllim heyətinin birgə təcrübi-konstruktor işlərinin təşkili ilə əlaqədar fikir mübadiləsi aparılıb.