NATO Sammitinin Müdafiə Sənayesi Forumu çərçivəsində ABŞ-ın “Lockheed Martin” və Almaniyanın “Rheinmetall” şirkətləri Avropada yerli döyüş sursatı istehsalının genişləndirilməsi məqsədilə Anlaşma Memorandumu imzalayıblar.
“Poliqon” “Rheinmetall”a istinadən xəbər verir ki, bu, NATO və müttəfiq ölkələrin Silahlı Qüvvələri üçün ATACMS (Army Tactical Missile System) taktiki raketlərinin istehsalı, inteqrasiyası və çatdırılmasını həyata keçirəcək Avropadakı ilk mərkəzin yaradılması istiqamətində mühüm addım hesab olunur.
Bildirilib ki, ATACMS raketlərinin Avropada birgə istehsalı regionun müdafiə-sənaye potensialını gücləndirəcək və müttəfiq ölkələrin çəkindirmə imkanlarını artıracaq.
“Lockheed Martin” tərəfindən istehsal olunan və uzun illər müxtəlif döyüş əməliyyatlarında istifadə edilən ATACMS, yüksək intensivlikli münaqişələrdə dəqiqliyi, etibarlılığı və əməliyyat effektivliyi ilə özünü təsdiqləyib.
