Azərbaycan və Türkiyənin Baş Qərargah rəisləri görüşüb – YENİLƏNİB
Qardaş ölkədə rəsmi səfərdə olan müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev tərəfindən Türkiyənin banisi Mustafa Kamal Atatürkün dəfn olunduğu məqbərə – Anıtqəbir ziyarət edilib.
Müdafiə Nazirliyinin mətbuat xidmətindən “Poliqon”a verilən məlumata görə, Azərbaycan nümayəndə heyəti məzar önünə əklil qoyaraq xatirəsini ehtiramla yad edib.
Baş Qərargah rəisi xatirə kitabına ürək sözlərini yazıb.
Sonra general-polkovnik K.Vəliyev türkiyəli həmkarı ilə görüşüb.
Əvvəlcə təntənəli qarşılama mərasimi olub, hər iki ölkənin Baş Qərargah rəisləri fəxri qarovulun önündən keçib, dövlət himnləri səsləndirilib.
Protokola uyğun olaraq şərəf kitabı imzalanıb.
Rəsmi qarşılanma mərasimindən sonra Baş Qərargah rəislərinin təkbətək və nümayəndə heyətlərinin iştirakı ilə geniş tərkibdə görüşü keçirilib.
Türkiyənin Baş Qərargah rəisi ölkələrimiz arasında strateji müttəfiqliyin dostluq və qardaşlıq münasibətləri üzərində qurulduğunu qeyd edib. Ordu generalı M.Gürak iki qardaş ölkə arasında əməkdaşlığın daha da genişləndirilməsi baxımından qarşılıqlı səfərlərin və bu cür görüşlərin vacibliyini xüsusi vurğulayıb.
General-polkovnik K.Vəliyev Azərbaycan Prezidenti, Silahlı Qüvvələrin Ali Baş Komandanı İlham Əliyevin tapşırığına əsasən, Ordumuzun Türkiyə modelinə uyğunlaşdırılması istiqamətində görülən işlərdən danışıb.
Ölkələrimiz arasında uğurla inkişaf edən əməkdaşlığın qarşılıqlı inam, etimad və dəstəyə əsaslandığı xüsusi vurğulanıb.
Görüşdə Azərbaycan ilə Türkiyə arasında hərbi əməkdaşlığın inkişaf perspektivləri və qarşılıqlı maraq doğuran bir sıra məsələlərə dair ətraflı fikir mübadiləsi aparılıb.
Sonda Azərbaycan nümayəndə heyətinə Türkiyə Silahlı Qüvvələrinin fəaliyyəti barədə brifinq təqdim olunub.
***
Müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev Ankarada Türkiyə Silahlı Qüvvələrinin Baş Qərargah rəisi ordu generalı Metin Gürak ilə görüşüb.
Bu barədə “Poliqon” Türkiyə Silahlı Qüvvələrinin mətbuat xidmətinə istinadən xəbər verib.
Bildirilib ki, əvvəlcə Türkiyə Silahlı Qüvvələrinin Baş Qərargahında general-polkovnik Kərim Vəliyevin rəsmi qarşılanma mərasimi olub.
Mərasimdən sonra Baş Qərargah rəisləri arasında görüş keçirilib.
