Bakının işğaldan azad edilməsindən 104 il ötür
Bu gün Bakının daşnak-bolşevik işğalından azad edilməsindən 104 il ötür.
“Poliqon” xəbər verir ki, 1918-ci il sentyabrın 15-də Azərbaycan və Türkiyə əsgərləri birlikdə Bakını bolşevik-daşnak işğalından azad edib.
Bununla da mayın 28-də müstəqilliyini elan edən Azərbaycan Xalq Cümhuriyyəti (AXC) ermənilərin və bolşeviklərin Bakı və ətraf rayonlardakı ağalığına son qoyub.
Bolşevik-daşnak silahlı birləşmələri Azərbaycanın nəzarətdə saxladıqları bölgələrində yerli əhaliyə qarşı soyqırımı törədib, insanları kütləvi şəkildə qətlə yetiriblər. İyun ayından bolşeviklərin silahlı dəstələri Azərbaycanın qərb rayonlarını öz təsirləri altına almaq üçün genişmiqyaslı əməliyyatlara başlayıb. Bunun qarşısını almaq üçün Osmanlı ilə AXC arasında imzalanan müqaviləyə əsasən, Nuru Paşanın komandanlıq etdiyi Qafqaz İslam Ordusu Azərbaycan Xalq Cümhuriyyətinin köməyinə göndərilib.
Qafqaz İslam Ordusu və Azərbaycanın yeni təşkil olunan Milli Ordu birləşmələri Göyçay yaxınlığında bolşevik-daşnak birləşmələrini məğlub edərək Bakıya doğru irəliləyib. Bakıya doğru bir neçə istiqamətdə hərəkət edən ordu birləşmələri Şamaxı, Kürdəmir və digər yaşayış məntəqələrini işğaldan azad ediblər.
Sentyabrın 15-də Qafqaz İslam Ordusu və Azərbaycan Korpusu Bakını işğalçılardan azad edib və bir gün sonra Qafqaz İslam Ordusu ilə Azərbaycan qoşunlarının rəsmi paradı baş tutub. Bu tarixi hadisədən sonra Azərbaycan Xalq Cümhuriyyəti hökumətinin paytaxtı Gəncədən Bakıya köçürülüb.