Belarus Silahlı Qüvvələri kiçikölçülü, aşağı sürətli və alçaqdan uçan aviasiya vasitələrinə qarşı mübarizə aparmaq üçün “AQAT-idarəetmə sistemləri” şirkəti tərəfindən hazırlanmış “Stena” sistemini silahlanmaya qəbul edib.
Bu barədə “Poliqon” Belarus Dövlət Hərbi-Sənaye Komitəsinə istinadən xəbər verib.
“Stena” kompleksi aşağı hündürlüklərdə uçan hava hədəflərinin aşkarlanması və onlara qarşı mübarizə, kritik əhəmiyyətli infrastruktur obyektlərinin qorunması, həmçinin müxtəlif tipli pilotsuz uçuş aparatlarından (PUA) stasionar və mobil mövqelərin müdafiəsi üçün nəzərdə tutulub.
Kompleksin əsas elementlərindən biri operatorun avtomatlaşdırılmış iş yeridir. Sistem akustik və seysmik sensorlar da daxil olmaqla müxtəlif kəşfiyyat vasitələrindən məlumatları qəbul edir, onları vahid informasiya mühitində birləşdirir və hədəfləri məhvetmə və ya elektron basdırma vasitələri arasında avtomatik bölüşdürə bilir.
“Stena”nın tərkibinə X-diapazonlu radiolokasiya stansiyası (RLS) da daxildir. RLS kiçik radar izinə malik hava obyektlərini aşkarlamaq və müşayiət etmək imkanına malikdir.
Kompleksin aşkarlama məsafəsi təyyarə və helikopterlər üçün 30 kilometrədək, orta ölçülü PUA-lar üçün 25 kilometrədək, mini PUA-lar üçün 15 kilometrədək, mikro PUA-lar üçün isə 6 kilometrədək təşkil edir.
Sistemin kompakt ölçüləri onun stasionar mövqelərlə yanaşı, hazırlanmamış ərazilərdə, binaların damlarında, mühəndis qurğularında və nəqliyyat vasitələrində yerləşdirilməsinə imkan verir. Radiolokasiya stansiyasının çəkisi 25 kq, fırlanma qurğusunun kütləsi isə 10 kq-dir. “Stena” sistemi günün istənilən vaxtında və müxtəlif meteoroloji şəraitdə hava məkanına fasiləsiz nəzarət imkanına malikdir.
