Bolqarıstan-Azərbaycan Ticarət və Sənaye Palatası Dağlıq Qarabağda gedən döyüşlərdə Azərbaycanı dəstəklədiyini açıqlayıb

Bolqarıstan-Azərbaycan Ticarət və Sənaye Palatası Dağlıq Qarabağda gedən döyüşlərdə Azərbaycanı dəstəklədiyini açıqlayıb.

Bu barədə “Azeri Defence”ə Palatanın Azərbaycan tərəfidən həmtəsisçi Ramin Əhmədov bildirib.

Onun sözlərinə görə Avropa Ticarət və Sənaye Palataları Assosiasiyasının prezidenti Kristof Leytl (Christoph Leitl) və Bolqarıstan Ticarət və Sənaye Palatasının prezidenti Svetan Smyonova (Tsvetan Smeonov) göndərilən məktubda bu məqam əks olunub.

Palatanın Bolqarıstanlı həmtəsisçisi olan Dimitar Bratanovun ünvanladığı və imzaladığı müraciətdə qeyd edilir ki, Bolqarıstan-Azərbaycan Ticarət və Sənaye Palatasının üzvləri 1 aydan çoxdur Qafqazda hərbi əməliyyatların inkişafını diqqət və narahatlıqla izləyir: “Bu hadisələr Azərbaycanın beynəlxalq aləmdə tanınan suveren ərazisində baş verir. İşğal olunmuş ərazilərin Azərbaycana qeyd-şərtsiz qaytarılması barədə BMT qətnamələrinin yerinə yetirilməməsi insan ölümləri və həmçinin sənaye və mülki infrastrukturun dağıdılması da daxil olmaqla hazırkı hadisələrə səbəb olub.

Hazırda Azərbaycan xalqının arzusu ərazilərini beynəlxalq səviyyədə tanınmış sərhədlər daxilində bərpa etməkdir və biz bu münaqişənin sülh yolu ilə tənzimlənməsi üçün bütün beynəlxalq və qeyri-hökumət təşkilatlarını yardıma çağırırıq.

Biz Azərbaycan xalqının münaqişəni sülh yolu ilə həll etmək və ərazi bütövlüyünü ədalətlə bərpa etmək üçün atdığı ədalətli və qanuni səylərini tam dəstəkləyirik”.