Böyük Vətən müharibəsi veteranları ilə görüş keçirilib

Müdafiə nazirinin tapşırığına əsasən  nazirliyin zabitləri faşizm üzərində Qələbənin 76-cı ildönümü münasibətilə Böyük Vətən müharibəsi iştirakçılarının bir qrupu ilə görüşüb.

Müdafiə Nazirliyinin mətbuat xidmətindən “Poliqon”a verilən məlumata görə, görüş iştirakçılarını general-polkovnik Zakir Həsənovun adından salamlayan polkovnik Elvin Əzizov Qələbənin qazanılmasında Azərbaycanın igid oğul və qızlarının layiqli töhfəsinin olmasını, yüz minlərlə həmvətənlinin canlarından keçməsini, Milli Azərbaycan diviziyalarının müharibə tarixinə parlaq səhifələr yazmasını, veteranların döyüşlərdə, o cümlədən arxa cəbhədə qəhrəmanlıq və fədakarlıq göstərmələrini xüsusi vurğulayıb.

Tədbirdə veteranların müstəqil Azərbaycanın ictimai-siyasi həyatında fəal iştirak etməsi, gənclərin orduya hazırlanmasında və ordumuzun şəxsi heyətinin döyüş ruhunun yüksəlməsində səylərini əsirgəməməsi yüksək qiymətləndirilib.

Görüşdə Azərbaycan Respublikası Müharibə, Əmək və Silahlı Qüvvələr  Veteranları Təşkilatının sədri Fatma Səttarova  və digər qonaqlar ümummilli lider Heydər Əliyevin ideyalarına, dövlətçiliyə, Ali Baş Komandana həmişə sadiq olan müharibə veteranlarının müasir mərhələdə ölkənin ictimai-siyasi həyatında xidmətlərindən danışıblar.

İkinci Dünya müharibəsi veteranları Ali Baş Komandana və Müdafiə Nazirliyinin rəhbərliyinə göstərdiyi diqqət və qayğıya görə minnətdarlığını bildiriblər.

Böyük Vətən müharibəsi iştirakçılarının bir qrupuna mükafatlar təqdim edildikdən sonra xatirə fotosu çəkdirilib.