“Dubai Airshow 2025”: Türkiyənin milli müdafiə nazirinin müavini MİRAS stendini ziyarət edib – FOTO/VİDEO
Türkiyənin milli müdafiə nazirinin müavini Bilal Durdalı və onu müşayiət edən nümayəndə heyəti “Dubai Airshow 2025” aviasiya sərgisi çərçivəsində Azərbaycan Müdafiə Nazirliyinin tabeliyində fəaliyyət göstərən “MİRAS Hərbi-Sənaye Şirkəti” MMC-nin stendini ziyarət edib.
“Poliqon” xəbər verir ki, səfər zamanı Türkiyə Milli Müdafiə Nazirliyinin nümayəndələri MİRAS-ın fəaliyyəti ilə yaxından tanış olub. Qonaqlara şirkətin müasir çağırışlara cavab verən, qabaqcıl texnologiyalara əsaslanan servis, inteqrasiya, texniki qulluq və təmir xidmətləri barədə ətraflı məlumat təqdim edilib.
Qeyd edək ki, MİRAS “Dubai Airshow 2025” sərgisində ilk dəfə Azərbaycanı stendlə təmsil edib. Şirkət tədbirdə innovativ yanaşmalar üzərində qurulan texniki xidmət, inteqrasiya və təmir imkanlarını nümayiş etdirib, həmçinin sərgi müddətində beynəlxalq tərəfdaşlarla görüşlər keçirərək yeni əməkdaşlıq perspektivlərini, o cümlədən potensial birgə layihələri müzakirə edib.
