Birləşmiş Ərəb Əmirliklərinin “EDGE Group” (EDGE) şirkəti 30 sentyabr – 2 oktyabr 2026-cı il tarixlərində Bakı Ekspo Mərkəzində keçiriləcək 6-cı Azərbaycan Beynəlxalq Müdafiə Sərgisində (ADEX-2026) hava hücumundan müdafiə (HHM), yüksək dəqiqlikli zərbə və elektron müharibə sahəsindəki imkanlarını təqdim edəcək.
EDGE-dən “Poliqon”a bildirilib ki, şirkətin 2024-cü ildəki ilk iştirakından sonra ADEX-ə qayıdışı Qafqaz və Mərkəzi Asiyanı vahid, qarşılıqlı əlaqəli bazar kimi hədəfləyən daha aydın strateji yanaşmasını nümayiş etdirir.
Region üzrə tələbat getdikcə eyni çağırışlar ətrafında formalaşır. Bunlar mübahisəli hava məkanı, zəiflədilmiş peyk naviqasiyası və uzunmüddətli perspektivdə yerli səviyyədə dəstəklənə bilən imkanlara ehtiyacı əhatə edir.
EDGE-in Beynəlxalq Biznes üzrə baş vitse-prezidenti Mayls Çembers vurğulayıb ki, region üzrə müştərilər artıq tək-tək məhsullardan daha irəli baxırlar. Onların əsas prioriteti təhdidlərin vahid inteqrasiya olunmuş zəncir vasitəsilə necə aşkar edildiyini, qarşısının alındığını və məhv edildiyini, həmçinin bu imkanların nə qədərinin yerli səviyyədə inkişaf etdirilib saxlanıla biləcəyini anlamaqdır.
“Biz ADEX-də məhz bu müzakirəni aparmaq üçün buradayıq. Bizim modelimiz texnologiya transferini, yerli istehsalı və təlimi birləşdirir ki, müştərilər sistemlərə sahib olsunlar və xarici dəstəkdən asılı qalmasınlar. Bu yanaşma region qarşısında uzunmüddətli öhdəliyimizin əsasını təşkil edir”, – deyə Mayls Çembers qeyd edib.
Şirkətin sərgidəki ekspozisiyası hava təhdidlərinin çoxqatlı şəkildə zərərsizləşdirilməsi konsepsiyası əsasında qurulub. Müşahidə radarı hədəfləri uzaq məsafədən aşkarlayır və təsnifləşdirir, elektron hücum vasitələri idarəetmə kanalını və naviqasiya siqnalını sıradan çıxarır, hava hücumundan müdafiə raket sistemi və ələkeçirici dronlar isə müdafiə xəttini keçən hədəfləri məhv edir. Bununla yanaşı, peyk naviqasiyasının zəiflədildiyi və ya tamamilə bloklandığı şəraitdə fəaliyyət göstərmək üçün hazırlanmış kamikadze sursatlar, idarəolunan planerləşən sursatlar və istiqamətləndirmə dəstləri də nümayiş etdiriləcək.
Stenddə həmçinin peyk naviqasiya qəbulediciləri üçün elektron mühafizə sistemləri, avtonom sərhəd müşahidə həlləri, aviasiya və artilleriya sursatları, eləcə də geniş çeşiddə qeyri-öldürücü texnologiyalar yer alacaq.
EDGE-in ADEX-ə qayıdışı şirkətin ixrac fəaliyyətində davamlı artım dövrünə təsadüf edir. Hazırda şirkətin ixrac coğrafiyası 100-dən çox ölkəni əhatə edir və Avropa, Latın Amerikası və Asiyada həyata keçirilən satınalmalar və tərəfdaşlıqlar vasitəsilə beynəlxalq sənaye mövcudluğunu genişləndirməyə davam edir.
Sərgi iştirakçıları EDGE-in geniş məhsul portfeli ilə 5A zalı, 210 nömrəli stenddə tanış ola bilərlər.
