Türkiyənin FNSS şirkəti İ-ZAHA çoxməqsədli modulyar insansız amfibiya maşınını ilk dəfə “TEKNOFEST Mavi Vatan” texnologiya festivalında təqdim edib.
“Poliqon” FNSS-yə istinadən xəbər verir ki, şirkət tərəfindən layihələndirilən və istehsal olunan İ-ZAHA, Türkiyə Hərbi Dəniz Qüvvələrinin (HDQ) inventarında olan amfibiya tipli ZAHA zirehli transportyorları ilə birgə fəaliyyət göstərmək üçün hazırlanıb.
Beləliklə, İ-ZAHA insansız amfibiya maşını və ZAHA zirehli transportyoru birlikdə insanlı-insansız komanda (MUM-T) konsepsiyası çərçivəsində tapşırıqları yerinə yetirəcək.
Sahilə desant çıxarılması əməliyyatlarında İ-ZAHA qarşı tərəfin sahil müdafiəsi ilə ilk təması insanlı platformalardan əvvəl quraraq operatorların bütün missiya müddətində təhlükəsiz ərazidə qalmasını təmin edir.
Dənizdən sahilə fasiləsiz hərəkət edə bilən 8 tonluq platforma suda 7 knot (təxminən 13 km/saat), quruda isə 70 km/saat sürətə çata bilir. Döyüş meydanında təxminən 40 dəqiqə ərzində dəyişdirilə bilən faydalı yük modulları sayəsində İ-ZAHA atəş dəstəyindən minatəmizləməyə, elektron müharibədən yaralıların təxliyəsinə qədər 10 fərqli tapşırıq konfiqurasiyasında istifadə edilə bilər.
İ-ZAHA avtomobil yolu, dəmir yolu və dəniz nəqliyyatı ilə daşına bilir. Uzaq məsafələrə sürətli şəkildə çatdırılması lazım olduqda isə ağır nəqliyyat helikopterləri və hərbi nəqliyyat təyyarələrindən istifadə edilə bilər. O, CH-47F “Chinook”, Mi-26, C-130 “Hercules”, A400M, C-17 “Globemaster”, C-5 “Galaxy”, An-124 və İl-76 kimi nəqliyyat vasitələri ilə daşına bildiyindən müasir hərbi logistika tələblərinə cavab verir.
