Hidayət Əzimov LAAD-2025 sərgisində bir sıra görüşlər keçirib
Braziliyanın Rio-de-Janeyro şəhərində keçirilən LAAD-2025 Müdafiə və Təhlükəsizlik Sərgisi davam edir.
Müdafiə Sənayesi Nazirliyinin Mətbuat Xidmətindən “Poliqon”a verilən məlumata görə, tədbirdə iştirak edən Azərbaycan müdafiə sənayesi nazirinin müavini Hidayət Əzimov aprelin 2-də Braziliyanın müdafiə naziri Jose Mucio Monteiro Filho ilə görüşüb.
Görüşdə LAAD-2025 sərgisində yüksək səviyyəli işgüzar mühitin formalaşdığı, bu beynəlxalq tədbirin müdafiə sənayesi sahəsində yeniliklərlə tanış olmaq üçün mühüm əhəmiyyət kəsb etdiyi vurğulanıb. Ölkələrimiz arasında müdafiə sənayesində birgə əməkdaşlıq imkanları, həmçinin hərbi-texniki sahədə əlaqələrin inkişaf perspektivləri müzakirə edilib, tərəfləri maraqlandıran digər məsələlər ətrafında fikir mübadiləsi aparılıb.
Sonda H.Əzimov Brazilyanın müdafiə naziri Jose Mucio Monteiro Filhonu 2026-ci ildə Bakıda keçiriləcək “ADEX” 6-cı Azərbaycan Beynəlxalq Müdafiə Sərgisinə dəvət edib.
Daha sonra nazir müavini Türkiyənin ASELSAN və “Sarsılmaz” şirkətlərinin rəhbər şəxsləri ilə görüşüb.
Görüşlərdə iki ölkə arasında hərbi-texniki sahədə uğurlu əməkdaşlıq münasibətlərinin olduğu, bu əlaqələrin yüksələn xətlə davam etdiyi vurğulanıb.
Qeyd edək ki, LAAD-2025 sərgisi aprelin 4-nə qədər davam edəcək.
