İlhami Keleş Azərbaycanda yaratdıqları yeni şirkət haqqında danışıb

Türkiyənin “Makine ve Kimya Endüstrisi” (MKE) şirkətinin baş direktoru İlhami Keleş “Poliqon” jurnalına müsahibəsində Azərbaycanda yaratdıqları yeni şirkət haqqında danışıb.

Baş direktor bildirib ki, MKE şirkəti 44 günlük Vətən müharibəsində Azərbaycan Ordusunun ehtiyaclarının müəyyənləşdirilməsi və bu ehtiyacların ən qısa zamanda qarşılanması üçün Türkiyə ilə aparılan genişmiqyaslı müzakirələr nəticəsində mövcud əlaqələrin gücləndirilməsi istiqamətində işlərə başlayıb.

“Bu işlərin və qurduğumuz yaxın münasibətlərin konkret göstəricisi olaraq Azərbaycanda şirkət qururuq. Bir çox dost və müttəfiq ölkədə texnologiya transferi modeli ilə həyata keçirdiyimiz istehsal xətti qurulmasının birini Azərbaycanda başladıq və layihə üzrə işlər plana uyğun şəkildə davam edir”, – deyə İ.Keleş vurğulayıb.

Qeyd edək ki, bu ilin oktyabr ayında Azərbaycan İqtisadiyyat Nazirliyi yanında Dövlət Vergi Xidməti “Makine ve Kimya Azerbaijan” MMC-ni dövlət qeydiyyatına alıb. Hüquqi ünvanı Bakı şəhəri, Səbail rayonu, Zərifə Əliyeva, 103 olan yeni şirkətin nizamnamə kapitalı 1 000 000 manat, qanuni təmsilçisi isə Türkiyə vətəndaşı İlhami Keleşdir.