İsrail Müdafiə Nazirliyinin Müdafiə Tədqiqatları və İnkişafı Direktorluğunun (DDR&D) tərkibində fəaliyyət göstərən Raketdən Müdafiə Təşkilatı, ABŞ Raketdən Müdafiə Agentliyi, İsrail Müdafiə Qüvvələri və “Israel Aerospace Industries” (IAI) şirkətinin birgə həyata keçirdiyi “Arrow” hava hücumundan müdafiə (HHM) sisteminin sınağı uğurla başa çatdırılıb.
Bu barədə “Poliqon” İsrail Müdafiə Nazirliyinə istinadən xəbər verib.
Bildirilib ki, bu sınaq sistemin inkişafı və təkmilləşdirilməsinə yönəlmiş çoxillik proqram çərçivəsində həyata keçirilib. Buraxılış İsrailin mərkəzi hissəsində yerləşən sınaq poliqonunda icra edilib.
Qeyd olunub ki, son illərdə “Arrow 2” və “Arrow 3” sistemləri İran və Yəməndən buraxılan çoxsaylı ballistik raketlərin, o cümlədən atmosferdənkənar yüksəkliklərdə uçan hədəflərin zərərsizləşdirilməsi zamanı yüksək effektivlik nümayiş etdirib.
Məlumata görə, İsrailin müdafiə qurumları qarşıdakı illərdə regionda meydana çıxacağı gözlənilən yeni təhdidlərə qarşı sistemi daim inkişaf etdirir və modernləşdirir. Bu fəaliyyət Müdafiə Nazirliyinin İsrailin texnoloji üstünlüyünü qorumaq, əməliyyat imkanlarını artırmaq və potensial düşmənlərin gələcək sürprizlərinə əvvəlcədən hazır olmaq strategiyasının bir hissəsidir. Uğurla başa çatan sınaq İsrailin mövcud və gələcək təhlükələrdən müdafiə qabiliyyətinin artırılması istiqamətində daha bir mühüm mərhələ hesab olunur.
“Arrow” sistemi İsrailin çoxqatlı hava və raketdən müdafiə şəbəkəsinin ən üst qatını təşkil edir. Bu müdafiə arxitekturasına, həmçinin “David’s Sling”, “Iron Dome” və “Iron Beam” sistemləri də daxildir. “Arrow” HHM sisteminin elementləri sırasına güclü “Green Pine” və “Super Green Pine” radarları, komanda-idarəetmə sistemi, atəşi idarəetmə sistemi, atmosferdənkənar yüksəkliklərdə və böyük məsafələrdə hədəfləri vurmağa imkan verən tutucu raketlər daxildir.
“Arrow” sisteminin hazırlanması və istehsalına İsrail Müdafiə Nazirliyi Raketdən Müdafiə Təşkilatı vasitəsilə rəhbərlik edir və layihə ABŞ-ın Raketdən Müdafiə Agentliyi ilə əməkdaşlıq çərçivəsində həyata keçirilir. Kompleks İsrail Hərbi Hava Qüvvələrinin Hava Hücumundan Müdafiə Komandanlığı tərəfindən istismar olunur.
“Arrow” sisteminin baş podratçısı “Israel Aerospace Industries” şirkətidir. Şirkətin “Systems, Missiles & Space Group” və radar sistemlərini hazırlayan “ELTA Group” bölmələri layihədə əsas rol oynayır. Atəşi idarəetmə sistemi “Elbit Systems” şirkəti tərəfindən hazırlanıb. Bundan başqa, dövlətə məxsus “Tomer”, “Rafael Advanced Defense Systems” və ABŞ-ın “STARK Aerospace” şirkətləri də “Arrow” raketlərinin hazırlanmasında əsas subpodratçılar sırasındadır.
İsrailin müdafiə naziri İsrael Katz bildirib ki, “Arrow” sisteminin keçirilən sınağı ölkənin müdafiə qurumunun, müdafiə sənayesinin və texnoloji imkanlarının gücünün növbəti sübutudur: ““Arrow” sistemi müharibə zamanı özünü doğruldaraq İran və digər istiqamətlərdən gələn çoxsaylı təhdidləri uğurla zərərsizləşdirib və İsrail vətəndaşlarını qoruyub. Biz onun imkanlarını daim təkmilləşdiririk və İsrail həm mövcud, həm də gələcək təhdidlərə qarşı hər zaman hazırdır. İsrailin təhlükəsizlik üstünlüyünü və vətəndaşlarının təhlükəsizliyini təmin etmək üçün dünyanın ən qabaqcıl müdafiə sistemlərinin hazırlanmasına sərmayə qoymağa, eyni zamanda hücum imkanlarımızı gücləndirməyə davam edəcəyik”.
İsrail Müdafiə Nazirliyinin baş direktoru, ehtiyatda olan general-mayor Amir Baram deyib ki, “Arrow” sisteminin bu inqilabi sınağı İsrail Müdafiə Nazirliyinin strategiyasının əsas prinsiplərini – texnoloji baxımdan irəlidə qalmaq üçün “növbəti sürprizləri” hazırlamağı və İsrailin silah sahəsində müstəqilliyini gücləndirməyi praktikada nümayiş etdirir: “İran kampaniyasındakı uğurlarımızdan sonra belə biz fövqəladə rejimdə işləyir, istehsalı sürətləndirir və sistemin imkanlarını genişləndiririk. Son bir ildə qəbul edilən qərarlar sayəsində İsrailin tutucu raket ehtiyatı yeni və daim inkişaf edən imkanlarla birlikdə artmaqda davam edir”.
IAI İdarə Heyətinin sədri Boaz Levi vurğulayıb ki, “Arrow” sistemi İsrailin İran və onun proksi qüvvələrindən gələn təhdidlərə qarşı mübarizəsində birbaşa və həlledici rol oynayır və IAI-nin ölkəyə təqdim etdiyi strateji və texnoloji üstünlüyün daha bir sübutudur: “İsrail və ABŞ-ın müdafiə qurumları ilə uzun illərə söykənən sıx tərəfdaşlığımız müttəfiqlərimizin böyük marağına səbəb olan yeniliklər və unikal texnologiyalar yaratmağa davam edir, eyni zamanda İsrailin təhlükəsizliyini və iqtisadiyyatını birbaşa gücləndirir. Hava təhdidləri daha mürəkkəb və müxtəlif olduqca, IAI dövlətləri, mülki əhalini və strateji obyektləri qoruyan qabaqcıl texnoloji həllər üzərində daha intensiv işləyir”.
