İsraildə “David’s Sling” qabaqcıl HHM sisteminin sınaqları uğurla tamamlanıb

Raketlər, mərmilər, təyyarələr və pilotsuz uçuş aparatlarını (PUA) zərərsizləşdirmək üçün nəzərdə tutulan “David’s Sling” qabaqcıl hava və raketdən müdafiə sisteminin sınaqları uğurla tamamlanıb.

Bu barədə “Poliqon” “RAFAEL Advanced Defense Systems” (“Rafael”) şirkətinə istinadən xəbər verib.

Bildirilib ki, sınaqlar İsrail Müdafiə Nazirliyinin Müdafiə Tədqiqatları və İnkişafı İdarəsi (DDR&D) daxilində fəaliyyət göstərən İsrail Raketdən Müdafiə Təşkilatı (IMDO), ABŞ Raketdən Müdafiə Agentliyi (MDA) və “Rafael” şirkəti tərəfindən birgə həyata keçirilib.

Son döyüş təcrübələrindən əldə olunan təcrübələr əsasında qurulmuş sınaq seriyası, mövcud və yeni yaranan təhdidləri simulyasiya edən geniş və çətin ssenariləri əhatə edib.

Qeyd olunub ki, bu sınaqların uğuru sistemin təkmilləşdirilməsində növbəti əhəmiyyətli texnoloji və əməliyyat irəliləyiş deməkdir.

“David’s Sling” İsrailin çoxqatlı hava və raketdən müdafiə arxitekturasında mərkəzi müdafiə təbəqəsi rolunu oynayır. O, “Arrow” və “Iron Dome” HHM sistemləri, o cümlədən son zamanlarda İsrail Hərbi Hava Qüvvələrinə təhvil verilmiş “Iron Beam” lazer sistemi ilə birlikdə fəaliyyət göstərir.

“David’s Sling” hava və raketdən müdafiə sisteminin əsas podratçısı “Rafael” şirkətidir. Sistemin MMR radarını “Israel Aerospace Industries” (IAI) şirkətinin ELTA bölməsi inkişaf etdirib, komanda mərkəzini isə “Elbit Systems” şirkəti hazırlayıb.