MSN-in məhsulları “IDEX-2021” sərgisində nümayiş etdirilir
Azərbaycan Müdafiə Sənayesi Nazirliyinin (MSN) nümayəndə heyəti fevralın 21-dən Əbu-Dabidə keçirilən “IDEX-2021” beynəlxalq müdafiə sərgisində iştirak etmək üçün Birləşmiş Ərəb Əmirliklərində (BƏƏ) səfərdədir.
Bu barədə “Poliqon”a Müdafiə Sənayesi Nazirliyinin mətbuat xidmətindən məlumat verilib.
Dünyanın inkişaf etmiş 59 ölkəsindən 900-ə yaxın qabaqcıl şirkətin qatıldığı “IDEX-2021” sərgisində MSN-in müəssisələrində yaradılan və istehsal olunan müxtəlif növ atıcı və yaxın məsafəli döyüş vasitələri, atıcı silahlar, minaatanlar, müxtəlif çaplı və təyinatlı döyüş sursatları, pilotsuz uçuş aparatları və s. daxil olmaqla 106 adda müdafiə təyinatlı məmulat nümayiş olunur.
Sərgi zamanı müdafiə sənayesi naziri Mədət Quliyevin BƏƏ-nin dövlət və hökumət nümayəndələri və sərgiyə qatılan ölkələrin rəsmi nümayəndə heyətlərinin rəhbərləri ilə görüşləri də nəzərdə tutulub.
“IDEX-2021” beynəlxalq müdafiə sərgisi öz işini fevralın 25-dək davam etdirəcək.